ҚАЛБИМ ҚУШИ

Айтишларича, 1 апрель - Афандининг туғилган куни экан. Биз бу кунни "Ҳазил куни" деб атаймиз. Билган ҳам, билмаган ҳам бир-бирига ҳазил қилади...

Мактабга кирар эканман, синфдошим Ҳикоят:

– Вой, ана ерга ручканг тушиб қолди,- деди у ўзини зўрға кулгудан тўхтатиб, мен ҳам бугунги кунни эсдан чиқарибман. Ҳикоятнинг гапларини ростга йўйиб, шартта орқамга қарасам ҳеч нарса йўқ. Бирдан кулгу эшитилди.

– Ҳа, жуда яхши иш қилдинг-да, -дедим қошларимни чимириб.

–Ҳа, билдим, бу кунни эсингдан кўтарилганини, - деди у кулгудан тўхтамай.

– Эҳ шошма-чи,- бирдан мен ҳам кулиб, юбордим.

 – Ахир бугун - 1 апрел-ку!

Иккаламиз кула-кула синфга кирдик. Синфдошлар билан ҳам ҳазиллашдик. Айримлари ишонишди, айримлари бизларни ишонтиришди. Шундай қилиб дарслар тугагач, уйга йўл олдик.

– Тез кийимларингни алмаштириб чиқ. Бирга тушлик қиламиз, - деди онам.

Онам ёлғиз овқатланишга одатланмаганлар. Ё мени ё укаларимни кутадилар.

Овқатланаётганимизда онамга  қўнғироқ қилишди.

– Нима? Қандай қилиб?, - деган саволларни  эшитиб,  тиқилиб қолдим.

– Нима бўлди ,ойи?!

– Момонг... - деди-ю йиғлаб юборди.

“Алдаяпсизми?” дейишга ҳам ботина олмадим. Чунки бундай гап билан ҳазиллашиб бўлмайди. Юрагимдан бир нарса суғурилгандай бўлди.

Йиғлайвериб кўзларим шишиб кетди. Солия момом ўн уч нафар фарзанднинг табаррук онахони эди. Жойлари жаннатда бўлсин, кўп насиҳатлар қиларди. Айтиб бўлиб, "Қулоғингга зирак бўлсин" дерди, бояқиш.

Сўнгги бор қариндошимизникида кўришган эдик. Ёши тўқсонга етиб, юзларига ажин тушган бўлса-да, қўлларида ғайритабиий илиқликни сезардим. Момом айниқса, баҳорни  интиқиб кутардилар...

– Баҳорнинг бетакрор жилваси борки, қушларнинг чағ-чағи мени ўзига жалб қилади. Ўрик дарахтининг гуллаган чоғларини яхши кўраман, - дердилар...

Васиятига биноан момомни “Сирчали” маҳалласидаги зиёратгоҳга - отамнинг қабри ёнига қўйдик. Ҳар баҳор момом севган - ўрик гулларига қараб тўймаймиз. Гўё момо тирикдай “Умрингиз гулларга тўлсин” деяётгандай туюлади, бизга. Ўша кун - 1 апрель мен учун ҳазил куни эмас, балки қалбимдан учган қуш каби ёдимда қолди.

Шаҳодат  РАЖАБОВА,

тумандаги 28-сон ихтисослаштирилган мактаб ўқувчиси.