ҲАҚИҚИЙ ВАТАНПАРВАРЛАРНИ ТАЙЁРЛАЙЛИК!

Жорий йил 23 ноябрь куни Ўзбекистон мудофаасига кўмаклашувчи “Ватанпарвар” ташкилоти ташкил этилганига 29 йил тўлди. Шу муносабат билан шаҳардаги “Хива карвон” ўқув спорт техника клубида ташкилий-амалий, маданий-маърифий ҳамда тарғибот-ташвиқот тадбирлари уюштирилди. Унга кўра, аввало жамоада тантанали йиғилиш ўтказилди. Соҳада кўп йиллик меҳнат фаолияти ҳамда муваффақиятлари учун бир гуруҳ ходимлар моддий ва маънавий рағбатлантирилди.
Шундан сўнг 9-сон умумий ўрта таълим мактаби ўқувчи-лари ўртасида пневматик ўқ отиш бўйича мусобақалар ташкиллаштирилди. Турнирда фаол иштирок этиб, фахрли ўринларга сазовор бўлган ёш ватанпарварлар диплом ва фахрий ёрлиқлар билан мукофотландилар.
Шу куни мусобақа қатнашчилари ва ўқув спорт техника клуби мутахассислари мактабда ташкил этилган “Ватан-парвар бурчаги”, соҳага оид кўргазма ҳамда адабиётлар билан яқиндан танишишди.
 

Ж.РАҲИМОВ,
шаҳардаги “Хива карвон” ўқув спорт техника клуби бошлиғи.

*  *  *

Ёш ватанпарварлар ҳаётида муҳим ўрин тутувчи ушбу кун туман ўқув спорт техника клубида ҳам ўзгача тарзда нишонланди. Олдиндан тарғибот-ташвиқот тадбирлари дастури ишлаб чиқилиб, ташкилотимиз хоналари ва ташқарисида шу кунга бағишланган шиорлар, Ватан ҳимоячиларининг машаққатли, аммо шарафли ҳаётини акс эттирувчи рангли баннер суратлар билан безатилди.
Клуб базасида “Ватанпарвар” ташкилоти кунига бағишлаб, туман ва шаҳар мактаблари ўқувчи ёшлари ўртасида пневматик қуроллардан ўқ отиш бўйича анъанавий мусобақалар ташкил этилди.
Мусобақаларда юқори натижаларга эришган ғолиблар фахрий ёрлиқлар, дипломлар ҳамда эсдалик совғалар билан тақдирландилар.

Д.ЙЎЛДОШЕВ, 
Хива туман ЎСТК бошлиғи. 

Н.ОТАБОЕВ, 
спорт мураббийси.