СОҲАДАГИ ЯНГИЛИКЛАР

“Ичон-қалъа” давлат музей-қўриқхонаси яқинида Хавфсиз туризмни таъминлаш бошқармасининг биноси фойдаланишга топширилганидан хабарингиз бор. Энди унинг “Вазиятлар маркази”даги мониторларга Хива шаҳридаги кузатув камералари интеграция қилинди. Бундан ташқари марказга кўҳна қалъа ҳамда вилоятимизнинг бошқа ҳудудларидаги туризм намойиши объектларига ўрнатилган сайёҳларга амалий ёрдам кўрсатишга мўлжалланган йигирмага яқин “Чақирув  тугмалари” ҳам интеграция қилинди.
Бу эса бошқарма ходимларига туризм намойиши объектлари ҳудудларида намунали жамоат тартибини сақлаш, фуқаролар хавфсизлигини таъминлаш, ҳуқуқ-бузарликларни барвақт олдини олиш билан бирга содир этилган жиноятларни иссиқ изида очилишида, шу аснода вилоятда хавфсиз туризмни таъминлашда кенг имкониятлар яратиб бермоқда.
Вилоятимизга ташриф буюраётган чет эл ва маҳаллий сайёҳларга қўшимча қулайликлар яратиш мақсадида вилоят ИИБ Хавфсиз туризмни таъминлаш бошқармаси жойлашган маъмурий бино алоқа телефон рақамлари, манзили, иш вақти ва бошқа маълумотлар ўзбек ва хорижий тилларда интернетнинг “Facebook” ижтимоий тармоғи ва “Google trans” иловаси орқали жойлаштирилди.
Шунингдек, бошқарма телефон рақамлари, электрон манзиллари ва интернет тармоғидаги манзилини осон топиш имкониятини берувчи QR-код акс этган ташриф қоғозлари ўзбек, рус ва инглиз тилларида ишлаб чиқилиб, вилоятдаги жойлаштириш воситалари, умумий овқатланиш шаҳобчалари ва сайёҳларга хизмат кўрсатувчи субъектларга тарқатилди.

Б.КАРИМОВ,
вилоят ИИБ Хавфсиз 
туризмни таъминлаш бошқармаси ходими.