“ИССИҚ ИЗ ”ДА ФОШ ЭТИЛДИ

Вилоят ИИБ Хавфсиз туризмни таъминлаш бошқармаси ходимлари томонидан туризм намойиши ва инфратузилмаси объектлари ҳудудларида чет эл ва маҳаллий туристлар ҳаёти, соғлиги ва мол-мулки дахлсизлигини таъминлаш, уларнинг тарихий обидаларни эмин-эркин зиёрат қилишлари учун барча хавфсизлик чоралари кўрилган. Айниқса, сайёҳларга нисбатан жиноят ва ҳуқуқбузарликлар содир этилишининг барвақт олдини олиш мақсадида қатор тезкор профилактик тадбирлар амалга оширилмоқда. Натижада ўтган 2020 йилдан то шу кунга қадар вилоятимизга ташриф буюрган туристларга нисбатан жиноят ва ҳуқуқбузарликлар содир этилмади. Шунингдек, хизмат ходимларининг ҳуқуқни муҳофаза қилувчи идоралар вакиллари билан ҳамкорликдаги тезкор тадбирлари давомида 25 та жиноят “иссиқ из”да фош этилди ва қидирувда бўлган 4 нафар шахс қўлга олинди.
Хавфсиз туризмни таъминлаш бошқармаси ҳамда Хива тумани ИИБ ходимлари томонидан ҳамкорликда ўтказилган тезкор тадбир давомида хивалик Ғ.Ғ. 2 та гугурт қутисига жойланган умумий вазни 3,77 грамм бўлган “марихуана” гиёҳвандлик воситасини қонунга хилоф равишда сотган пайтида ашёвий далиллар билан қўлга олинди.
Олиб борилган суриштирувлар жараёнида Ғ.Ғ. ушбу гиёҳвандлик воситасини Урганч шаҳрида яшовчи танишлари С. Р. ҳамда И. Ю.лардан сотиб олганлиги маълум бўлди. Ўтказилган навбатдаги тезкор тадбирда бу гиёҳфурушлар умумий вазни 0,67 грамм бўлган “марихуана” гиёҳвандлик воситасини сотаётганида ушланди. Уларнинг чўнтаги холислар иштирокида кўздан кечирилганида 0,76 грамм “марихуана” гиёҳвандлик воситаси ҳамда пневматик тўппонча борлиги маълум бўлди.

В.ДАВЛАТОВ,
вилоят ИИБ ХТТБ тезкор вакили, лейтенант.