SHU KO'HNA ZAMINDA TUG'ILISH,

YASHASH-BAXT!

+998 62 377 46 54

220900 Хива шаҳри

Марказ-1.  4-уй.

“XIVA TONGI” нашриёт уйи

ХАЛКАРО ИЛМИЙ-АМАЛИЙ КОНФЕРЕНЦИЯ ЎТКАЗИЛАДИ

maxresdefault

Жалолиддин Мангуберди жасоратининг ёш авлодни миллий ғурур ва ватанпарварлик руҳида тарбиялашдаги тарихий аҳамиятини кенг тарғиб қилиш мақсадида Ўзбекистон Республикаси Вазирлар Маҳкамаси томонидан 2021 йилнинг ноябрь ойида «Жалолиддин Мангуберди тарихининг янги саҳифаларини ўрганиш» мавзусида халқаро илмий-амалий конференция ўтказиш тўғрисида Фармойиш имзоланди.
Ҳужжатга кўра, халқаро илмий-амалий конференцияни ўтказиш доирасида «Жалолиддин Мангубердининг дунё тарихида тутган ўрни» мавзусида тарихий ҳужжатли фильм суратга олинади. Шунингдек, «Жалолиддин Мангуберди изидан» номли илмий, маънавий-маърифий экспедиция ташкил этиш, тарихий сиймо ҳарбий маҳоратига оид бадиий, илмий, публицистик саҳна асарлари ва қўшиқлар яратиш, «Ким юртига қалқон бўлса, мендирман ўша!» шиори остида ижодий ишлар кўрик-танловлари ташкил этиш тегишли вазирлик ва идора масъулларига юклатилди.

 

ЎзА.
 

ТЕМИР ИНТИЗОМ БИЛАН Ўз соғлигимизни ўзимиз асрайлик!

Мамлакатимизда карантин чоралари жорий йил 15 августгача узайтирилди.
Бугунги кунда дунё олимлари коронавирус давосини топиш учун изланишлар олиб бормоқдалар, бироқ, ҳанузгача маълум даво воситаси аниқланмаса-да, бу борада изланишлар тўхтагани йўқ. Унгача биз ўзимизни ўзимиз асрашимиз, ўз соғлигимиз учун, албатта, ўзимиз қайғури-шимиз зарур. Охирги кунларда республикамизда касалланиш даражаси кундан-кунга ортиб бораётгани, фуқароларнинг эҳтиётсизлиги оқибатидир. 
Муҳтарам Президентимизнинг “Бугунги мураккаб вазиятда барчамиз “Ўз соғлиғингни, ўз болангни, ўз оилангни ўзинг асра!” деган шиорга амал қилиб яшашимиз зарур”,- де-я таъкидлаган сўзларини барчамиз кундалик шиор қилиб олиб, карантин қоидаларига қатъий риоя қилган ҳолда касалликни енгиб ўтмоғимиз лозим. Негаки, бутун дунёда минг-минглаб одамларнинг ўлимига сабаб бўлаётган бундай хатарли офатга асло бепарво қараб бўлмайди. Касалликнинг бирор-бир кичик белгисини ўзингизда сездингизми, дарҳол шифокорга мурожаат қилинг, ўзингизча уйда даволанаман, деб касалликни авж олишига ва оила-аъзоларингизга юқишига асло йўл қўйманг. 
Халқимиз, оиламиз ва фарзандларимиз саломатлиги ва ҳаёти биз учун энг улуғ бойлик. Шундай экан, бу касалликка бефарқ қарашга, ўрнатилган карантин талабларини бузишга ҳеч биримизнинг ҳаққимиз йўқ. Гўзал ҳаётимизни илгаригидек яна изга тушиб кетиши, иқтисодиётимизни тикланиши учун пандемия шароитида яшаш ва меҳнат қилишга ўрганишимиз, барча эҳтиёт чораларини кўриб, бу борада бошлаган ишларимизни Юртбошимиз айтганидек, темир интизом билан давом эттиришимиз керак.
Биз улуғ авлиёлар, юксак маънавиятли, маърифатли буюк алломаларнинг авлодларимиз. Жипслигимиз шундай синовли кунларда билинади. Сабрлилик, шукроналик бизнинг миллатимизга хос олий фазилатдир. Шундай бағри кенг, маърифатли ҳалқнинг зурриёдлари бугун яратганга минг бора шукур қилган ҳолда барчамиз бир тану бир жон бўлиб шифокорлар тавсиясига амал қилсак, бу касалликни албатта енгиб ўтамиз.

Ш.АБДУЛЛАЕВА,
Республика Маънавият ва маърифат маркази 
Хива шаҳар бўлинмаси раҳбари.

ИБОДАТЛАР МУКОФОТИ

Зулҳижжанинг ўнинчи кунида бу ойнинг ҳилоли чиқиши билан олам аро бошланган ибодат сайли ўзининг авж палласига кўтарилади. Саноқли кунлардаги ибодатларнинг мукофоти – Қурбон ҳайити кўзларимизни қувонтириб, оламга меҳмон бўлади. Моли нисобга етган мўмин-мусулмонлар бундай дориломон кунларга офият ила етказгани ва бошқа барча зоҳирий ва ботиний неъматлари учун Яратганга шукрона сифатида қурбонликлар сўядилар. У кунда Оллоҳ таоло учун қон чиқазишдан ҳам кўра маҳбуброқ бўлган бирон-бир амал бўлмас. Шу жиҳатлардан ҳам Ийдул-Aзҳо байрами алоҳида эътиборга моликдир.  
У шунинг учун ҳам шундай номландики, у кунда Оллоҳ таолодан бандаларга лутфу иноят, инъому эҳсонлар қайтади, ёки бундай номланишига сабаб, у кун такрор-такрор келади, қайта-қайта нишонланиб, байрам қилинади. Ёхуд у одамларга шодлик олиб келгани учун шундай номланган, ё еса, худди карвонни яхши ният билан "қофила" яъни "қайтиб келувчи" деб номлаганлари сингари, бу кунга ҳам қайта етишиш насиб бўлишига умид боғлаб, некбинлик юзасидан «ийд» номи берилган. 
Мусулмон шахс бундай синовли кунларда янада кўпроқ Оллоҳдан бўладиган ажр ва савоб умидида атрофдагиларга ёрдам қўлини чўзиб, яҳшилик қилиб қолишлиги лозим.
Бутун оламларнинг Роббиси бўлган Зот Оллоҳ таоло бугунда бутун инсониятга ташвиш бўлиб турган пандемия балосини бошимиздан кўтарсин. Беморларга ҳам ўзининг хазинасидан комил шифолар ато айласин. Кириб келган байрамингиз муборак бўлсин, азизлар.

 

С.САПАЕВ,
Хива тумани бош имом хатиби.

ҚУШ УЯСИДА КЎРГАНИНИ ҚИЛАДИ

Мамлакатимизда  карантин  вазиятида уйда қолган вақтдан фойдаланган ҳолда катта авлод вакиллари келажагимиз бўлган ёшларга маънавий қадриятларимизни, урф-одатларимизни ўргатишимизнинг айни пайтидир. Оилада, аввало ўзаро ҳурматни тўғри йўлга қўйиш лозим. Бунда катта авлод вакиллари - ота-оналаримиз, бобо-бувиларимиз шахсий намуна бўлишлари керак. Зеро катта арава изидан кичик арава юради, ёхуд қуш уясида кўрганини қилади.
Танганинг иккинчи томонига қарай-диган бўлсак, карантин вақти фарзандларимизнинг таълим-тарбиясига алоҳида эътибор қаратадиган, оила даврасида вақтимизни янада кўпроқ ўтказишимиз учун шароитимиз ҳам, вақтимиз ҳам етарли бўлаяпти.
Давлатимиз томонидан карантин даврида мактаб ўкувчилари учун онлайн дарсларнинг яратилиши, айрим соҳа вакилларининг иш фаолияти  онлайн тизимига ўтказилиши бу ҳалқимизга яратилган кенг имкониятлардан биридир. 
Ҳозирги жиддий вазиятда миллий қадриятларимизнинг туб негизига эътиборимизни қаратсак. Хонадонда оиланинг барча аъзолари дастурхон атрофига жам бўлиб, маънавиятимизни юксалтиришга харакат қилсак, ёшларимизни китобга бўлган меҳрини шахсий намуна орқали ривожлантирсак айни муддао бўлади, азиз элдошлар!

Зубайда АЛЛАБЕРГАНОВА,

Хива шаҳар Маҳалла ва оилани қўллаб-қувватлаш бўлими бошлиғининг  биринчи ўринбосари, халқ депутатлари шаҳар Кенгаши депутати.
 

ЎТТИЗ ЙИЛ ОЛДИНГИ ФАКТЛАР ЯРОҚСИЗ

Дунёдаги ҳар бир мамлакат, ўзининг аҳолиси ва унинг яшаш ҳолати бўйича ишончли маълумотга эга бўлиш мақсадида мунтазам равишда аҳолини рўйхатга олади. 

Ҳозир жаҳоннинг кўплаб ривожланган давлатларида аҳоли ўртача ҳар ўн йилда камида бир марта рўйхатдан ўтказилмоқда. Халқаро амалиёт шундай! Бизда-чи? Ўзбекистон ҳудудида илк бор аҳолини рўйхатга олиш тадбири 1897 йилда амалга оширилган. Шундан сўнг 1926, 1939, 1959, 1970, 1980 йилларда аҳоли рўйхатга олинган. 
Амалдаги жорий ҳисобга кўра, 2020 йилнинг 1 июль ҳолатига кўра Хива шаҳар ва туманининг доимий аҳоли сони мос равишда 92,5 минг киши ва 145,5 минг кишини ташкил этади. Хива шаҳрида жами аҳолининг 49,6 % ни эркаклар (45,9 минг киши), 50,4 % ни аёллар (46,6 минг киши),  Хива туманида жами аҳолининг 49,6 % ни эркаклар (72,2 минг киши), 50,4 % ни аёллар (73,3 минг киши) ташкил этади. 
Аҳолининг жорий ҳисоби бўйича мавжуд маълумотлар аҳоли сони, яшаш шароити, маълумоти, бандлиги, ёш-жинс таркиби, миллат таркиби, Хива шаҳар ва туман ҳудудида аҳолининг жойлашуви ва бошқа ижтимоий-демографик ўзига хосликлар тўғрисида аниқ хулоса ва таҳлиллар қилишга етарлича имконият бермаяпти.
Мамлакатимизда 1989 йилдан кейин ҳали бирор марта ҳам аҳолини рўйхатга олиш ишлари бажарилмади. Бу масала роппа-роса 30 йил ортга суриб келинди. Шу туфайли демографик муаммоларимиз қалашиб кетди. Одамларнинг ҳақиқий ҳаёт тарзини ўрганиш ва уларга амалий ёрдам кўрсатишда қатор қийинчиликлар вужудга келди.
Ниҳоят  БМТ 2015 йилнинг 10 июнида “2020 йилда аҳоли ва уй-жой фондини рўйхатга олиш борасидаги принциплар ва тавсиялар” резолюциясини қабул қилди. Унга кўра, БМТга аъзо давлатлар камида бир марта аҳоли ва уй-жой фондини рўйхатга олишни ўтказиши белгилаб қўйилди. Ҳозир Ҳамдўстлик давлатларида бу жараёнга тайёргарлик бошланиб кетган. Хусусан, Ўзбекистонда ҳам! Президентимизнинг 2019 йил 5 февралдаги “Ўзбекистон Республикасида 2022 йилда аҳолини рўйхатга олишни ўтказиш консепциясини тасдиқлаш тўғрисида”ги Фармони бу борада ҳуқуқий асос бўлиб хизмат қилмоқда.

Ҳ.ЭГАМОВ,
Хива шаҳар статистика бўлими бошлиғи.

Ш.БОБОЖОНОВ,
 Хива туман статистика бўлими бошлиғи. 

 

ДЕПУТАТ ТЎЙГА БОШ-ҚОШ БЎЛАДИ

Меҳр-оқибат, хайр-саховат, кўмак, ҳашар каби бизнинг азалий удумларимиз, ўзига хос қадриятларимиз борки, булар авлоддан-авлодга ўтиб келмоқда.

Айниқса, ҳозирги пандемия шароитида ижтимоий муҳофазага муҳтож, тўю томошаларни кам чиқимли тарзда ўтказиб, ортиб қолган маблағга ёшларни келажаги учун, уларнинг мод-дий турмуш шароитини яхшилаш учун сарфлаш энг мақбул ва оқилона йўл эканлигини таъкидлаш ўринлидир.
Қашқадарё вилояти Китоб туманидан Халқ депутатлари вилоят кенгашига Ўзбекистон Миллий тикланиш демократик партиясидан сайланган депутат Муаббара Ҳакимова ўзи сайланган ҳудудлар – “Боғбон”, “Бектемир”, “Соҳибкор” маҳалла фуқаролар йиғинларида бўлиб, кам таъминланган, эҳтиёжманд, боқувчисини йўқотган ва ногиронлиги бор оилалар ҳолидан хабар олди.
Депутат “Очамайли” қишлоғида истиқомат қилувчи ногирон онахон Назокат Султонова хонадонида бўлиб, у кишининг яшаш шароити билан танишди. Қизи ҳам ногирон, аммо ўғли Асқарбек бақувват, соғлом эканлиги, у оилани иқтисодий таъминлаш учун ёлланма ишларга чиқиши, ишда бўлган вақтида эса эс-ҳуши онаси ва опасида бўлишидан хабардор бўлди. Шунда депутат, Асқарбек бир инсофли, диёнатли, ҳунарманд қизни топиб уйлантириб қўйилсагина хотиржам ишлаши ва иш унуми юқори бўлиши, бир оила камбағалликдан чиқиб кетиши мумкинлигини айтиб таклиф берди. 
Яъни қўни-қўшни ва маҳалла маслаҳат-чисига Асқарбекни кўнглига ёқадиган қиз топиб, менга билдирсангиз тўйга ўзим бош бўламан, деб илтимос қилди. Орадан икки ҳафта ўтгач, маслаҳатчи Зарифа опа қўнғироқ қилиб, тикувчи қиз топилганини ва у Асқарбекка ёққанини, ёшлар турмуш қуришга аҳд қилганлигини билдирди.
М.Ҳакимова фарзандининг тўйи тараддудида юрган онахонга кўмак бериб, унинг ёнида турмоқда. Асқаржонни тўйига тайёргарлик ишлари бошлаб юборилди. Улар томонидан келин учун бетакрор, чиройли либослар, қимматбаҳо газламалардан иборат сеп, кўрпа-тўшаклар тайёрланди.
Ташаббус сабаб Асқарбекни тўйини карантин талабларига мос кам чиқим қилиб ўтказиб берувчи саховатли ҳомий ҳам топилди. Карантиндан сўнг тўй депутат бошчилигида ўтказиладиган бўлди.
Доно халқимизда “Савоб ишни ҳар ким, ҳар кун қилиши даркор” деган пурҳикмат ибора бор. Юртимиз бағрикенг, саҳоватпеша, савоб талаб инсонларга бой. Ана шундай савобли, хайрли ишларимиз кўпаяверсин. Ёшларни қўллаб-қувватлаб, уларга бахт тилаб, кўмак бериб, хайриҳоҳ бўладиган ишларимиз бардавом бўлсин.

 

Шаҳноза ҚАҲҲОРЗОДА,
Ўзбекистон Миллий тикланиш демократик партияси вилоят кенгаши матбуот котиби.

 

“БИНОКОР”ДА ЯНА КЎП ҚАВАТЛИ УЙЛАР ҚУРИЛАДИ

Еттита ана шундай уйлар маҳалла ҳудудида барпо этиш режалаштирилган. Қувончлиси, янги турар-жойларнинг 1-қаватида озиқ-овқатлар дўкони, дорихона, сартарошхона каби маиший хизмат кўрсатиш шахобчалари жойлашади.
Бу ҳақда Хива шаҳар ҳокими С.М.Жуманиязов яқинда уйма-уй юриб, аҳоли муаммоларини ўрганишга бағишланган йиғилишда айтиб ўтди.
- Бундан ташқари анчадан буён бўш, фойдаланилмаётган биноларни тадбиркорларга ижарага бериш орқали ишсизлар, камбағаллик даражасини қисқартириш мумкин.
Йиғилишда Бандлик маркази, коммунал хизмати, электр энергияси, газ таъминоти, истеъмол суви ташкилотлари раҳбарларига жид-дий эътирозлар билдирилди.
- 2-қаватда яшайдиган ногирон эр-хотин икки километр масофадан хонадонига сув ташишмоқда. Бу қанақаси? “Водопровод” таш-килоти қаерга қараяпти? Шу ташкилотнинг раҳбари Баҳром Яқубов тезда вазиятни ўрганиб, истеъмолчиларга амалий ёрдам кўрсатинг, деб топшириқ берди ҳоким.
Мутасаддилар маҳаллани йиллар давомида келиб, ўр-ганмагани кўриниб турибди. Бу ерда жуда кўп эътиборталаб ҳаётий муаммолар тўпланиб қолган. Вазифа эса қисқа фурсатлар ичида ушбу масалаларга ижобий ечим топиш, чора-тадбирлар белгилашни тақоза этади. Вақт кутиб турмайди.

ДУГОНАЛАР

Насиба зиёли оилада туғилиб вояга етди. Ота-онаси фарзандлари кўп бўлишига қарамай, ҳар бирининг ўқишига алоҳида эътибор қаратишар, уларга мунтазам вақт ажрата олардилар.
Унинг дугонаси Умиданинг ҳеч нарсадан ками йўқ, қўл узатган нарсасига етадиган қиз. Фарзандининг ақлли, тартибли ва ораста бўлиши учун уйдагилар ҳеч нарсани аяшмас, нимани кўнгли тусаса, дарров муҳайё килишарди. Бироқ, у ота-онасининг ишончини оқлаш у ёқда турсин, хатто дугонаси танбех берса ҳам ўз айтганидан қолмайдиган бетга чопар, шаддод қиз бўлиб ўсди.
Насиба одобли, зукко қиз бўлгани боис олий ўқув юрти талабаси бўлди. Олийгоҳ дом-лалари шундай қизни тарбиялаган ота-онасига миннатдорчилик билдириб, келажакда Насибадан ажойиб, ўз ишининг моҳир устаси бўлиб етишиб чиқишига ишонардилар.
Умида эса мактабни аранг тугатиб, ҳеч қаерда ўқишни истамади. Дугонаси Гули билан сартарошга шогирд тушишди. Гули Умиданикига тез-тез келиб турар, орада онасининг тақинчоқларини кўз-кўз қи-ларди. Бу зеби-зийнатлар Гулининг кўзини ўйнатарди.
...Орадан йиллар ўтди. Бир куни Гули билан Умида ўрта-сида гап қочиб, бир-бири билан юз кўрмас бўлиб кетишди. Гап орасида Умиданинг асранди экани, онаси фарзанд кўрмага-ни, етимлиги ҳам айтилди.  
Шу воқеадан кейин ота-онаси ҳар қанча уринмасин, Умидани уйда олиб қолишнинг иложи бўлмади. У уйдан чиқиб кетиб, болаликдаги дугонаси Насибани қидириб топди. Бўлган воқеаларни йиғлаб-йиғлаб гапириб берди. Насиба дугонасининг тўғри иш қилмагани, ота-она қандай бўлмасин уни вояга етказгунга қадар озмунча машаққат чекмагани, уйга қайтиши хақида қанча айтмасин, барибир унамади. 
Умида Насибанинг уйида яшай бошлади. Бу хақда Насиба унинг ота-онасига хабар қилди. Бироз вақтдан кейин дугонаси қилган хатосини тушуниб етиши хақида гапирди. Умида бўш пайтларда Насибанинг китобларини ўқирди. Абдулла Қодирийнинг “Ўткан кунлар”, Ўткир Хошимовнинг “Дунёнинг ишлари” китобларини мутолаа, қилар, улардан олам-олам маъно оларди. Фикри тиниқлашди. Ота-онасини қўмсай бошлади ва бир куни Насибага уйга қайтишга уялаётгани хақида гапириб қолди. Насиба дугонасининг қароридан севинди, унга ўзи бошлаб боришини айтди. 
- Ўтган зое кетган давримни сарҳисоб қилсам, биринчидан, сендек дугонам борлиги мен учун – бахт экан! Иккинчидан, сен тавсия қилган китоблар менинг тафаккуримни бутунлай ўзгартириб юборди. Уларни ўқиб, ўзбек аёлидаги шарм-ҳаё, иффат, Отабекдаги жасорат эгаси бўлишга ҳава-сим ортди. Шундай ота-онам борлигидан ўзимни бахтли хис қилдим, орзуларимга эришиш иштиёқи янада ошди. Яшашдан мақсад нима экани, онани қандай эъзозлаш кераклигини англадим. Бунинг учун сенга рахмат! - дея йиғлаб юборди.
Умиданинг ота-онаси ажралмас дугоналарни қучоқ очиб кутиб олишди.
...Насиба уйига қайтар экан, китобхонлар сафи яна биттага кўпайганидан хурсанд бўлди.

Мақсуда ЮСУПОВА,
Хива шаҳридаги 1-сон мактаб она тили ва адабиёти фани ўқитувчиси.

ХАТ ҲАЁТ НАФАСИ

Мактублар, мактублар, сон-саноқсиз мактублар... Таҳририятимизга келаётган ана шундай қалб сатрларида қайноқ ҳаёт нафаси акс этади.  Зеро аллома шоиримиз Матназар Абдулҳаким айтганидек: “хат-ҳаётнинг юлиб олинган парчасидир”.
Хабарларнинг бирида буюк ўзгаришлар, хусусан, “Обод қишлоқ” ва “Обод маҳалла” дастури бўйича амалга оширилаётган кенг кўламли ишлар васф этилса, иккинчисида таъминотдаги узилишлар, йўлларнинг носозлиги, бозорлардаги ноқулайликлар каби холатлар куюнчаклик билан қайд қилинади.
Ўтган йил тарихга олтин ҳарфлар билан ёзиладиган йил бўлди. Қисқа фурсатларда Президент мактаби, Огаҳий ижод мактаби, маданият ва истирохат боғи, меҳмонхоналар қурилди, йўлларга асфальт ётқизилди. Би сўз билан айтганда Кўҳна қаъламиз ўтмиш билан бугунни уйғунлаштириб, ёрқин келажак сари одимламоқда.
Бундай ўзгаришлар барчамизни тўлқинлантиради, янада янги марраларни забт этишга чорлайди.
Ҳар бир соҳанинг йил якунида сарҳисоби бўлганидек, биз таҳририят ходимларининг ҳам кўпсонли муштарийларимизга айтадиган сўзимиз, илинжимиз бор. Чунки, матбуот ҳаёт ойнаси. Жамиятда учрайдиган хусну малоҳатни ҳам, қабоҳатни ҳам бирдек ёритади.
Ҳар бир таҳририят шубҳасиз хат билан фаол. Ранг баранг мавзулар хат орқалигина газетада содда, равон тил билан ифодаланади. 2019 йилда бизга 1500дан зиёд хат, ариза шикоят келди. Уларда турли муаммолар, камчиликлар,  таклифлар, фикрлар ўртага ташланган.
- Ҳаётимнинг бирор кунини даврий нашрларсиз тасаввур қилолмайман,-деб  ёзади муаллима Умида Абдураҳмонова, - чунки дарс жараёнида воқеа, янгилик ва хабарларни ўқувчиларимга ҳам ўқиб бераман. Ўзим ҳам тажрибаларимни “Хива тонги” газетаси орқали ҳамкасбларим билан ўртоқлашаман.
Дарвоқеа, таҳририятимиз билан мустаҳкам алоқа ўрнатган Умидадек муштарийлар ва жамоатчи мухбирларимизнинг сафи йилдан-йилга кенгайиб бормоқда. Улардан, “Саломатлик” маркази валеолог шифокори Аминбой Болтаев, маънавият ва маърифат тарғибот маркази шаҳар бўлинмаси раҳбари Шоҳиста Абдуллаева, мусиқашунос Давлатназар Юсупов, спорт шарҳловчиси Рустам Хўжаев, хуқуқшунос Гавҳаржон Саъдуллаева каби ўз соҳалари бўйича таҳририятимизга мақолаларини жўнатаётган кўмакдошларимиз борки, биз улар билан хақли равишда фахрланамиз. Янги йилда ҳам улардан янги мазмундаги хат-хабарлар кутамиз.
Муштарийларимизнинг байрам билан самимий муборакбод этиб, газетамиз орқали доимий ҳамроҳ бўлишга, мактублар йўллашга даъват этамиз. 2020 йил ҳаётингизнинг асл маъно-мазмунига айлансин. Сизларни Ишонч, Умид ва Муҳаббат асло тарк этмасин, азизлар!

“Хива тонги” 
газетаси таҳририяти. 

ҲАРОМ ПУЛ – ДЎЗАХГА ЎТИН

Оллоҳ  таоло инсонга беҳисоб неъматлар ато қилган. Фарзанд неъмати бўлсин, мол-дунё неъмати бўлсин – буларнинг барчаси дунё ҳаётининг зийнатидир.
Ҳаворийлар Ҳазрат Исодан сўрадилар: “Сенинг ниманг борки, сув узра юра оласан, биз эса юролмаймиз?” Ҳазрати Исо: “Сиз ўз наздингизда пулни қандай баҳолайсиз?” Ҳаворийлар: “Яхши баҳолаймиз.” Ҳазрати Исо: “Менинг наздимда пул билан лой бир қийматдадир.” дедилар.
Ҳасан Басрий айтдлар: “Пул азиз қилган ҳар инсонни Оллоҳ хор айлагай, шунинг учун ҳам Оллоҳ ҳалол қилиб мол-дунёни, маблағларимизни ҳаром йўлларга ишлатиб дўзахга ўтин қилмайлик.”
Оллоҳ берган неъматларнинг қадрига етиб, умргузаронлик қилиб яшасак, Оллоҳ таоло умримизни, ризқимизни, давлатимизни янада зиёда айлагай!

Ш.БОЙНАЗАРОВ,
тумандаги Хон Исмоил Журжоний масжиди имоми.

 

СЕВИМЛИ ГАЗЕТАНГИЗГА ЁЗИЛИШНИ УНУТМАНГ!

2020  йил  учун "Хива тонги"  газетасининг  обуна  баҳоси 135 000 сўм қилиб белгиланди. Нашр кўрсаткичи-8008.
Обуна "Ўзбекистон поч-таси" Хива филиалида ва "Матбуот тарқатувчи" шўъба корхонаси филиалида ҳамда бевосита таҳририятимизда қабул қилинмоқда.