SHU KO'HNA ZAMINDA TUG'ILISH,

YASHASH-BAXT!

+998 62 377 46 54

220900 Хива шаҳри

Амир Темур қўчаси 52-уй

“XIVA TONGI” нашриёт уйи

Эътироф

ЎЗБЕКИСТОН ПРЕЗИДЕНТИ “ТУРКИЙ ДУНЁ ТИКЛАНИШИГА ҚЎШГАН УЛКАН ҲИССАСИ УЧУН"  ХАЛҚАРО МУКОФОТИГА САЗОВОР БЎЛДИ

Ўзбекистон Республикаси Президенти Шавкат Мирзиёев Туркий дунё ёзувчилари, зиёлилари ва санъаткорлари жамғармаси (Türk Dünyası Yazarlar ve Sanatçılar Vakfı – ТУРКСАВ) томонидан таъсис этилган “Туркий дунё тикланишига қўшган улкан ҳиссаси учун” халқаро мукофотига сазовор бўлди.
 

+13                                                                                                                                                        Бу ҳақда ТУРКСАВнинг Анкарада ўтказилган махсус матбуот анжуманида маълум қилинди.
Мукофот соҳибининг исми-шарифи ТУРКСАВ​ ҳайъати коллегиал қўмитаси томонидан Туркия ва хорижий давлатларнинг таниқли сиёсатчилари, иқтисодчилари, фан ва санъат намоёндаларининг 2019 йилдаги фаолиятини ўрганиш натижалари асосида эълон қилинди.
ТУРКСАВ​ мукофотини топшириш маросими 2020 йил май ойида Анқарада Туркия парламенти, ҳукумати, кенг жамоатчилиги, ишбилармон доиралари ва санъат арбоблари иштирокида тантанали тарзда ўтказилиши режалаштирилган.
Ҳар йили бир марта бериладиган ушбу халқаро мукофот ҳайъатининг қарори Ўзбекистон раҳбарининг “мамлакатнинг ташқи дунё, Туркия ва Марказий Осиё давлатлари билан сиёсий ва иқтисодий алоқаларини изчил мустаҳкамлашдаги беқиёс хизматлари ва амалий ҳиссаси, шунингдек, Туркий кенгашдаги ҳамкорликни сезиларли даражада жонлантиргани, ушбу ташкилот доирасидаги янги ташаббуслар, шу жумладан 2020 йилда Хива шаҳрини “турк дунёсининг маданий пойтахти” деб эълон қилиш бўйича ташаббуси“ учун бир овоздан қабул қилингани маълум қилинди.
Матбуот анжуманида сўзга чиққанлар Ўзбекистонда Президент Шавкат Мирзиёев раҳнамолигида ҳаётнинг барча жабҳаларида амалга оширилаётган туб ўзгаришларга юқори баҳо берди. Мамлакат раҳбарининг изчил ислоҳотларни ўтказишдаги кенг кўламли фаолияти, самарали ишлари, Туркий дунёнинг муҳим давлати бўлган Ўзбекистоннинг жадал тараққиётини таъминлаётган стратегик курс, нафақат Ўзбекистон, балки Марказий Осиёнинг янада ривожланиши учун қулай ички ва ташқи шароитлар яратилаётгани таъкидланди.
ТУРКСАВ​ раҳбари Яҳё Энгин йиғилганлар номидан Ўзбекистон раҳбарига “унинг Ўзбекистон, Марказий Осиё, Туркия ва умуман Туркий дунё олдидаги беқиёс ва тарихий хизматларининг камтарона, бироқ самимий эътирофи муносабати билан чуқур ҳурмат ва самимий табриклар” йўллади.

1+2 ТУРКСАВ​ 1996 йил Туркиянинг бир гуруҳ зиёлилари ташаббуси билан ташкил этилган жамоатчилик асосидаги нодавлат ташкилотдир. ТУРКСАВ​ халқаро мукофотининг асосий мақсади туркий дунёнинг атоқли арбоблари фаолияти натижаларига жамоатчилик эътиборини жалб қилиш, уларнинг туркий тилли ҳудудни мустаҳкамлаш ва ривожлантиришга қўшаётган ҳиссасига ҳурмат билдириш ва эҳтиром келтиришга қаратилган.
Мукофотга турли йилларда Туркия Президенти С.Демирел, Озарбайжон Президенти Ҳ.Алиев, Қозоғистон Президенти Н.Назарбоев, ТУРКСОЙ бош котиби Д.Касеинов ва бошқалар сазовор бўлган. Улар орасида туркий дунё мамлакатларининг фаол парламентарийлари, тадбиркорлари ва санъаткорлари ҳам бор.
 

"Дунё" АА.
Анқара

 

ЙИГИТ ОМОН БЎЛСА...

Дунёда касблар кўп. Лекин Ватан ҳимоячиси бўлиш энг шарафлидир. Ахир она-Ватанни кўз қорачиғидек асраш мард, жасур ўғлонларимизнинг зиммасига юклатилган. Бизнинг одамларимиз ҳеч қачон душман олдида чекинмай то сўнгги нафасигача курашган. Агар Иккинчи жаҳон урушини эсласак, мамлакатимизни фашистлар қўлига топширмаган барча ҳимоячиларни номма-ном санаш қийин. Афсуски уларнинг кўпчилиги бу йўлда шаҳид кетдилар.
Ёш ўзбек ўғлонлари ҳами-ша ватанпарварлик руҳида таълим-тарбия олишади. Улар Давлат ва оила ҳар нарсадан афзал эканлигини жуда яхши билишади. Ҳар қандай қийин вазиятларда ҳам она-Ватанни ҳимоя қилишга, севишга ва қадрлашга қодирдир. Чунки Ватан ягонадир.
14 январь куни барча жойда Ўзбекистон Республикаси мадҳияси янграб, харбий оркестрнинг тантанали маршлари садолари остида аскарлар саф тортиб ўтадилар. Ватан мустақиллиги йўлида жонини фидо қилган мард ўғлонлар шарафига бунёд этилган ёдгорлик пойига гулчамбарлар қўйадилар.
Ҳар бир оилада Ватанни ҳар қандай хавф-хатардан асрашга қодир инсон бор. Бу кун айнан ҳақиқий ўғлонларни шарафлашга бағишланган кундир. Шоир айтганидек, биз учун йигит омон бўлса қўрғон  бут,  хавф-хатар йўқ!


Юлдуз ЮСУПОВА,
Хива шаҳридаги 
12-мактаб ўқувчиси.

ЯНГИ ЎЗБЕКИСТОННИ АЛБАТТА, ЁШЛАР БИЛАН БИРГА ҚУРАМИЗ

Президент Шавкат Мирзиёев 2019 йил 27 декабрь куни пойтахтдаги Муҳаммад ал-Хоразмий номидаги ахборот-коммуникация технологиялари йўналишига оид фанларни чуқурлаштириб ўқитишга ихтисослаштирилган билим муассасаси билан танишди. Шундан сўнг Президентимиз мактаб конференц залида ёшлар билан учрашув ўтказди.
Йиғилишни видеоконференц- алоқа шаклида мамлакатимизнинг барча ҳудудларидаги ёшлар, мутасадди раҳбарлар кузатиб борди.
Видеоконференцалоқада топширилган вазифаларни бажариш юзасидан шаҳар ҳокимлигида кенг жамоатчилик вакиллари, ёшлар билан ўтказилган йиғилишда ҳоким С.М.Жуманиёзов ёшлар ўртасида ҳуқуқбузарлик, оилавий ажралишларнинг олдини олиш бўйича тегишли ташкилотлар раҳбарларига кўрсатмалар берди. Жамиятда ёшларнинг роли ва обрўсини ошириш, уларга қулай шароит яратиш, муаммоларни тезроқ ҳал этиш зарурлиги таъкидланди.
- Афсуски 2019 йилда шаҳри-миз бўйича 67 оила ажралиб кетган. Уларнинг 11 нафаари 30 ёшгача бўлган оилалардир,- деди С.М.Жуманиязов.-Ажралиш битта бўлса ҳам кўп. Қани жамоатчилик роли, ёшлар етакчилари қаерда?
Янги йилнинг дастлабки кунларидан бошлаб, Хивадаги ишлар кўҳна қалъа қадриятларига мос ва хос тарзда ташкил қилиниши керак. “Йилнинг энг ёш ибратли оиласи” танлови, “Беш ташаббус-беш ғоя”, “Аскар – маҳалла фахри”, “Мен ҳам ҳарбий бўламан!”, “Аскар оналарини шарафлайлик!”, “Ибратли тенгдошим” каби мавзуларда учрашув ва мулоқотларни тизимли йўлга қўйиш лозим. Бунда айниқса, Муҳтарам Президентимиз алоҳида таъкидлаганидек, етакчиликнинг, ўз ортидан эргаштиришнинг энг тўғри йўли шахсий ўрнак ва намуна бўлишдир.
- Янги Ўзбекистонни албатта, ёшлар билан бирга қурамиз. 2020 йил ёшларга оид давлат сиёсатида туб бурилиш йили бўлади,-деди Президент видеоконференцалоқада.- Ёшлар орасида “Мен Сизнинг ёнингизда туриб, камарбаста бўламан!” деб кўзи ёниб турган, билимли, жасоратли йигит-қизлар борлигига ишонаман.
***
Шунингдек, куни кеча туман ҳокими О.А.Матяқубов ҳам ҳудди ана шу эзгу мақсадни кўзлаган ҳолда ҳудудлардаги йигит-қизлар билан учрашди. 22-, ҳамда 6-сон мактабларда ташкил этилган учрашувда ёшларнинг муаммолари тинг-ланиб, уни бартараф этиш чоралари кўрилди. Ташаббускор, яратувчанлик иштиёқида ёниб яшаётган ёшларнинг ғоя ва амалга оширмоқчи бўлган истиқболли режалари тингланиб, уларга амалий ёрдам бериладиган бўлди.
Ёшлар бизнинг эртамиз, порлоқ келажагимиз. Бугуннинг ёшлари замонавий интелектуал салоҳиятли, дунёқараши кенг, ўз мустақил фикрига эгадир. Янги Ўзбекистонни бирга қуришда юраги жўш уриб, она-Ватан равнақи, унинг эртаси учун жон куйдирувчи, замонамиз бунёдкорлари билан ҳамиша фахрланмиз.
ЎзА, “Хива тонги” мухбирлари.

ЯНГИ ЙИЛДА...

#Тилак

Ёшлар, ҳар ишда зафарга тиришинглар,
Янги-янги марраларга эришинглар,
Тўсолмасин сизни бирон довон, чеклар,
Керак, сиз келажак учун янгиликлар!

Сиз қуражак қаср пойдевори тайёр,
Орзу рўёбига имконингиз бисёр,
Сизга йўл кўрсатар қадимий битиклар,
Битиклар давоми бўлсин янгиликлар!

Ўзбекистон тинчлик ён тиллашувларда,
Доимо дунёдаги беллашувларда,
Зўрларим гимнимга жўр байроғим тиклар,
Янги йилда ўссин тағин янгиликлар!

Бахтиёр авлодсиз, Жўшқин иқболингиз,
Юксалсин янада, юксак камолингиз,
Аждодлар эзгу-ишончин сизга юклар,
Билан - ҳар янги йил тўлсин - янгиликлар!
                                      ЖЎШҚИН.

ХИЗМАТ КЎРСАТИШНИНГ ЯНГИ ТИЗИМИ

Президентимиз ташаббуси билан аҳолига мутлақо янги тизим – Давлат хизматлари агентлиги ва унинг ҳудудларда марказлари ташкил этилди. Янги йил арафасида Хива шаҳар давлат хизматлари марказининг янги биносини тантанали очилиш маросими бўлди. Вилоят ҳокими Ф.Ў.Эрманов кенг жамоатчилик вакиллари иштирокида марказ ходимларига ва бино қурувчиларига самимий тилакларини изҳор этди.

1+2

Янги марказ бутунлай ўзгача руҳда кашф этилган, энг сўнги русумдаги техник воситалар билан таъминланган, кенг ва ёруғ  хоналарда мурожаат қилувчи аҳолига барча қулайликлар яратиб қўйилган бўлиб, инвес-торларни кутиб олишга мўлжалланган музокара зали, кутубхона, ёш болали оналар учун, шунингдек, овқатланиш хоналари мавжуд. 
- Марказимиз томонидан аҳолига 100 дан ортиқ хизматлар кўрсатилмоқда,-дейди марказ раҳбари А.Алланазаров,- Давлат хизматлари агентлиги республи-камизнинг барча фуқаролари яшаш жойидан қатъий назар, экстерритериал пунктлари асосида сифатли давлат хизматларидан фойдаланиш имконини яратишга алоҳида эътибор қаратади. 
Маълумот ўрнида айтиш жоизки, Хива шаҳрида жами 91 мингдан зиёд аҳоли истиқомат қилади. Бугунги кунда шаҳар Давлат хизматлари маркази томонидан  жами 36 мингдан ортиқ  хизматлар кўрсатилган бўлиб, шундан 1030 га яқини сайёр тартибда амалга оширилди.


                                                                                                                              Мафтуна РЎЗИМАТОВА,                                                                                Давлат хизматлари Агентлиги вилоят бошқармаси жамоатчилик ва ОАВ билан алоқалар шўъбаси етакчи маслаҳатчиси.
Дилмурод МАШАРИПОВ,
“Хива тонги” мухбири.

УНУТИЛМАС ОНЛАР
...Ўқувчилар гапни бир жойга қўйишди. Жамоладдин-Қорбобо, Севинчой-Қорқиз, Асалой эса чиройли ёзилган “2020 йил” ёзувини бошига тақадиган бўлишди. Бирин-кетин синфга кириб келишганида синфдошлари уларни олқишлар билан қарши олишди...
Шаҳардаги 1-мактабда ҳар гал “Янги йилим-яхши йилим” давраси ана шундай унутилмас қувноқ онларга бой бўлади. Чиройли безатилган арча атрофида болалар дилдан яйрашди: куй-қўшиқлар, шеъру ғазаллар ва охирида... Қорбобо совға тўла халтасини очди.
Анапошша СУЛТОНОВА,
 шу мактаб бошланғич синф ўқитувчиси.

 
ГЎШТ НЕГА АРЗОНЛАМАЯПТИ?

826__90_2808800717

Агар бугунги кунда гўштнинг нархи ҳақида гап кетса, ҳамма аввало қассобларни айблаши турган гап. Лекин танганинг икки томони бўлганидек, ҳамма айбни улардан қидириш ҳам инсофданмас. Хўш, унда бозордан, даллоллардан нуқсон ахтариш керакми? Келинг, шу ҳақда озгина мулоҳаза юритайлик.
Нарх-наво ҳамма замонларда тушиб- чиқиб турган. Чунки кўп нарса чорва озуқасига, уларнинг бош сонига ҳам боғлиқ. Бозор механизмларини ишлаб чиқишда гўшт ва гўшт маҳсулотларига бўлган талаб энг юқори даражада эканлигини унутмаслик лозим. Бу ҳақда мутахассиснинг фикри қандай? Шу мақсадда туман ветеринария ва чорвачиликни ривожлантириш бўлими бошлиғи Абдурасул Абдуллаевга юзландик:
- Ҳар бош шартли молга 0,3 гектар ер ажратилиши керак. Чорвага ихтисослашган фермер хўжаликлари бу имкониятдан фойдланишади. Лекин аҳоли-чи? Ҳамма гап шунда. Уларда бундай имкон йўқ. Натижада аҳоли чорва озуқа маҳсулотларини бозордан сотиб олишга мажбур. Гўшт нархини пасайтиришнинг бирдан бир йўли омухта ем маҳсулотларини аҳолига биржадан ташқари арзон нархларда етказиб бериш керак.
Иккинчидан, тумандаги “Йўлдош Мажид”, “Нуржон бобо”, “Азамат” каби фермер хўжаликлари қошидаги сутни қайта ишлаш корхоналари аҳолидан олинаётган сут учун тўловларни олдиндан берсалар бу ҳам анча енгилликлар туғдириши тайин. Шуниси қувончлики, бу корхонлар 6-7 ҳил турдаги маҳсулот ишлаб чиқаришга эришмоқдалар.
Учинчидан, шаҳар ва туманимиздаги мавжуд бозорлар ва шаҳобчаларда тез-тез қишлоқ хўжалиги маҳсулотлари ярмаркаси ташкил қилиб турилса, бу ҳам нарх-навони мўътадил тутиб туришга ёрдам беради.
***
Хулоса ўрнида шуни алоҳида таъкидлаш лозимки, ташкилотчиликда ҳикмат кўп. Агар мутасадди ташкилотлар аҳолига ўз вақтида сифатли қишлоқ хўжалиги маҳсулотларини қулай нархларда етказиб беришга бош бўлсалар, хайрли ишга ҳисса қўшган бўладилар. Зеро халққа хизмат – олий химат деб бежиз айтилмаган. 
Бинобарин, ҳаммани бирдек ўйланти-раётган ушбу долзарб мавзуга шу билан якун ясамаймиз, балки яна шу мавзуга қайтамиз. Бу ҳақда Сизнинг фикр-мулоҳазаларингизни кутамиз, азизлар!

ТАБРИКЛАЙМИЗ!

Янги йилнинг дастлабки кунини шаҳар мактабгача таълим бўлими қувончли хабар билан бошлади.
Ўзбекистон Республикаси мактабгача таълим вазири А.В.Шин имзоси билан мактабгача таълим тизимида олиб борилаётган ислоҳотларни жадаллаштириш ҳамда мактабгача таълим ёшдаги болалар қамровини оширишда муносиб ҳисса қўшиб келаётганлиги учун Мадримова Гулнора Машариповна Фахрий Ёрлиқ билан тақдирланди.
Хива шаҳар мактабгача таълим бўлими раҳбари Г.Мадримовани ушбу мукофот билан самимий табриклаб, соҳани жадаллаштиришдаги саъй ҳаракатларига янада ривож тилаймиз.

ХАТ ҲАЁТ НАФАСИ

Мактублар, мактублар, сон-саноқсиз мактублар... Таҳририятимизга келаётган ана шундай қалб сатрларида қайноқ ҳаёт нафаси акс этади.  Зеро аллома шоиримиз Матназар Абдулҳаким айтганидек: “хат-ҳаётнинг юлиб олинган парчасидир”.
Хабарларнинг бирида буюк ўзгаришлар, хусусан, “Обод қишлоқ” ва “Обод маҳалла” дастури бўйича амалга оширилаётган кенг кўламли ишлар васф этилса, иккинчисида таъминотдаги узилишлар, йўлларнинг носозлиги, бозорлардаги ноқулайликлар каби холатлар куюнчаклик билан қайд қилинади.
Ўтган йил тарихга олтин ҳарфлар билан ёзиладиган йил бўлди. Қисқа фурсатларда Президент мактаби, Огаҳий ижод мактаби, маданият ва истирохат боғи, меҳмонхоналар қурилди, йўлларга асфальт ётқизилди. Би сўз билан айтганда Кўҳна қаъламиз ўтмиш билан бугунни уйғунлаштириб, ёрқин келажак сари одимламоқда.
Бундай ўзгаришлар барчамизни тўлқинлантиради, янада янги марраларни забт этишга чорлайди.
Ҳар бир соҳанинг йил якунида сарҳисоби бўлганидек, биз таҳририят ходимларининг ҳам кўпсонли муштарийларимизга айтадиган сўзимиз, илинжимиз бор. Чунки, матбуот ҳаёт ойнаси. Жамиятда учрайдиган хусну малоҳатни ҳам, қабоҳатни ҳам бирдек ёритади.
Ҳар бир таҳририят шубҳасиз хат билан фаол. Ранг баранг мавзулар хат орқалигина газетада содда, равон тил билан ифодаланади. 2019 йилда бизга 1500дан зиёд хат, ариза шикоят келди. Уларда турли муаммолар, камчиликлар,  таклифлар, фикрлар ўртага ташланган.
- Ҳаётимнинг бирор кунини даврий нашрларсиз тасаввур қилолмайман,-деб  ёзади муаллима Умида Абдураҳмонова, - чунки дарс жараёнида воқеа, янгилик ва хабарларни ўқувчиларимга ҳам ўқиб бераман. Ўзим ҳам тажрибаларимни “Хива тонги” газетаси орқали ҳамкасбларим билан ўртоқлашаман.
Дарвоқеа, таҳририятимиз билан мустаҳкам алоқа ўрнатган Умидадек муштарийлар ва жамоатчи мухбирларимизнинг сафи йилдан-йилга кенгайиб бормоқда. Улардан, “Саломатлик” маркази валеолог шифокори Аминбой Болтаев, маънавият ва маърифат тарғибот маркази шаҳар бўлинмаси раҳбари Шоҳиста Абдуллаева, мусиқашунос Давлатназар Юсупов, спорт шарҳловчиси Рустам Хўжаев, хуқуқшунос Гавҳаржон Саъдуллаева каби ўз соҳалари бўйича таҳририятимизга мақолаларини жўнатаётган кўмакдошларимиз борки, биз улар билан хақли равишда фахрланамиз. Янги йилда ҳам улардан янги мазмундаги хат-хабарлар кутамиз.
Муштарийларимизнинг байрам билан самимий муборакбод этиб, газетамиз орқали доимий ҳамроҳ бўлишга, мактублар йўллашга даъват этамиз. 2020 йил ҳаётингизнинг асл маъно-мазмунига айлансин. Сизларни Ишонч, Умид ва Муҳаббат асло тарк этмасин, азизлар!

“Хива тонги” 
газетаси таҳририяти. 

ҲАРОМ ПУЛ – ДЎЗАХГА ЎТИН

Оллоҳ  таоло инсонга беҳисоб неъматлар ато қилган. Фарзанд неъмати бўлсин, мол-дунё неъмати бўлсин – буларнинг барчаси дунё ҳаётининг зийнатидир.
Ҳаворийлар Ҳазрат Исодан сўрадилар: “Сенинг ниманг борки, сув узра юра оласан, биз эса юролмаймиз?” Ҳазрати Исо: “Сиз ўз наздингизда пулни қандай баҳолайсиз?” Ҳаворийлар: “Яхши баҳолаймиз.” Ҳазрати Исо: “Менинг наздимда пул билан лой бир қийматдадир.” дедилар.
Ҳасан Басрий айтдлар: “Пул азиз қилган ҳар инсонни Оллоҳ хор айлагай, шунинг учун ҳам Оллоҳ ҳалол қилиб мол-дунёни, маблағларимизни ҳаром йўлларга ишлатиб дўзахга ўтин қилмайлик.”
Оллоҳ берган неъматларнинг қадрига етиб, умргузаронлик қилиб яшасак, Оллоҳ таоло умримизни, ризқимизни, давлатимизни янада зиёда айлагай!

Ш.БОЙНАЗАРОВ,
тумандаги Хон Исмоил Журжоний масжиди имоми.

 

СЕВИМЛИ ГАЗЕТАНГИЗГА ЁЗИЛИШНИ УНУТМАНГ!

2020  йил  учун "Хива тонги"  газетасининг  обуна  баҳоси 135 000 сўм қилиб белгиланди. Нашр кўрсаткичи-8008.
Обуна "Ўзбекистон поч-таси" Хива филиалида ва "Матбуот тарқатувчи" шўъба корхонаси филиалида ҳамда бевосита таҳририятимизда қабул қилинмоқда.