SHU KO'HNA ZAMINDA TUG'ILISH,

YASHASH-BAXT!

+998 62 377 46 54

220900 Хива шаҳри

Марказ-1.  4-уй.

“XIVA TONGI” нашриёт уйи

СЕН -- ҚУДРАТ МАНБАИ, САОДАТ МАСКАНИ, ЖОНАЖОН ЎЗБЕКИСТОНИМ!

Халқимизнинг улуғвор қудрати жўш урган ҳозирги замонда Ўзбекистонда янги бир уйғониш – Учинчи Ренессанс даврига пойдевор яратилмоқда, десак, айни ҳақиқат бўлади. Чунки бугунги Ўзбекистон – кечаги Ўзбекистон эмас. Бугунги халқимиз ҳам кечаги халқ эмас.

Шавкат МИРЗИЁЕВ,
Ўзбекистон Республикаси Президенти.

 

“Ўзбекистон – ТУРКСОЙ” китоби нашрдан чиқди

турксой Тақдимотда ТУРКСОЙ Бош котиби Дусейн Касеинов “Ўзбекистон – ТУРКСОЙ” китоби чоп этилиши муносабати билан ташкилотнинг барча аъзоларини қутлади.
Унинг таъкидлашича, ушбу нашрда 2020 йилда Хива шаҳрининг Турк дунёси маданияти пойтахти деб эълон қилиниши муносабати билан ўтказилган анжуман ва фестиваллар ҳақидаги маълумотларга кенг ўрин берилган.
Туркий халқлар буюк шахс-лари, хусусан, улуғ мутафаккир Алишер Навоий, ўзбек адабиётининг йирик намояндаларидан Абдулла Қодирий, янги ўзбек адабиёти вакили, шоир Шукруллонинг турк шеърияти ва санъатига қўшган улкан ҳиссаси ҳақидаги маълумотлар билан бойитилган.
Тақдимот давомида Ўзбекистоннинг Анқарадаги элчиси Алишер Аъзамхўжаев ушбу китобдан жой олган ўзбек миллий урф-одатлари ва анъаналари ҳақидаги мақолалар аҳамиятига алоҳида тўхталди. Унинг қайд этишича, китобни ўзбек тилига таржима қилишда Туркия олий ўқув юртларида таҳсил олаётган ўзбекистонлик талабаларнинг ҳиссаси катта бўлган.
Онлайн тарзидаги тақдимот давомида Эркин Воҳидовнинг “Ўзбегим” қасидасидан парчалар ўқилди, туркий давлатлар санъат усталари томонидан Хива шаҳрининг гўзаллиги, санъати, урф-одати ҳақидаги тарона ижро этилди.

 

ЎзА.

ҲАЛОЛ ВА САМАРАЛИ МЕҲНАТЛАРИ УЧУН нуронийлар “Меҳнат фахрийси” кўкрак-нишони билан тақдирланди

НуронийДилорам Рахимова                                                                                                 Яқинда Ўзбекистон фахрийларининг ижтимоий фаолиятини қўллаб-қувватлаш “Нуроний” жамғармаси Васийлик Кенгаши қарори билан Дилором Раҳимова II-даражали, Рустам Машарипов III-даражали “Меҳнат фахрийси” кўкрак нишони билан мукофотланди. Ушбу қувончли хабар муносабати билан “Нуроний” жамғармаси Хива шаҳар бўлинмасида тадбир ташкил этилди.
-  Ҳар ким кексайганда умр бўйи қилган меҳнатлари роҳатини кўрсин, - дейди II-даражали “Меҳнат фахрийси” кўкрак нишони соҳибаси Дилором Раҳимова. – Юртимизда биз нуронийлар мана шундай бахтга, эъзоз ва эҳтиромга муяссар бўлаётганимиздан беҳад мамнунмиз.
Шунингдек, тадбирда давлат ва жамият ҳаётидаги ижтимоий иштироки, маҳаллаларда тинчлик осойишталикни таъминлаш, оилаларга маънавий муҳитни соғомлаштириш, ўсиб келаётган ёш авлодни ҳарбий ватанпарварлик руҳида тарбиялаш йўлидаги фаоллиги учун “Нуроний” жамғармаси раиси Отаназар Пирназаров Республика бошқаруви раисининг ташаккурномаси билан тақдирланди.

(Ўз мухбиримиз).

“КЕЛАР ЗАМОН УЧУН ҲОЗИРЛАНАЙЛУК...”

Халқимиз азалдан маърифат ва маданиятга интилувчан халқ. Ўтмиш алломаларимизнинг ҳаёти ва тафаккур олами ҳам бунга мисолдир. Қолаверса, уларнинг “чин мочиндан бўлса-да, бориб илм ўрган!” деган даъватлари бугунги кунимизда ҳам муҳим аҳамият касб этади.
Маърифатпарвар адиб Маҳмудхўжа Беҳбудийнинг “Келар замон учун ҳозирланайлук...” деган хайқириғида чуқур маъно ва мазмун мужассам.
Бизнинг “Пирнахос” маҳалламиздан ҳам кўплаб илм соҳиблари, маърифатпарвар фидойи инсонлар етишиб чиққан. Улардан бири менинг волидаи муҳтарамам Султонпошша Самандарова ана шундай пирлар нафас қилган гўзал ва обод масканда вояга етиб, шогирдлари чексиз ҳурмат-эҳтиромига сазовор бўлиб келаётган устоз-мураббийдир.
Онам 18-сон умумий ўрта таълим мактабида  ўқувчиларга она тили ва адабиёти фанидан қарийиб 30 йил давомида дарс бериб, ижодкор ўқитувчи сифатида фаолият кўрсатганлар. Унинг таълим-тарбияга оид мақолалари даврий нашрларда ҳам чоп этилган.

 

- Шогирдларим мени йўқлаб келишганида бошим осмонга етади, - дейди онам собиқ ўқувчиларининг бугунги муваффақиятларидан қувониб, - уларнинг эришган ажойиб ютуқларидан доимо фахрланаман.
Мактабда Дилором Оллаберганова, Шохиста Салаева, Сайёра Жуманиёзова, Садоқат Сапаева каби устоз-шогирд анъаналарини давом эттираётган педагоглар пандемия шароитида ҳам ўқувчиларига “ОNLINE” шакли билан сабоқ ўтдилар.
Шу ўринда биринчи муаллимим Сайёра Жуманиёзова ҳақида қалб ташаккуримни изхор қилмоқчиман. Унинг бундан ўттиз йил муқаддам мактабга илк қадам қўяётган пайтда айтган сўзлари ҳамон қулоғим остида жаранглаб турибди:
- Мен 1-синфга келаётган жажжи болажонларни ёш ниҳолларга қиёслайман. Ниҳоллар қуёш тафтидан қанчалик ёруғ-ликка интилса, ўқувчилар бизнинг меҳр-муҳаббатимиздан шунчалик маънавий озуқа оладилар.
Бугун янги ўқув йили бошланиши куни болажонлар қалб кўзини соғинган Сайёра опа каби жонкуяр устоз-мураббийлар ўз ўқувчиларини ана шундай меҳр туйғуси ила қарши олмоқдалар.

Орзугул ОТАНАЗАРОВА,

тумандаги “Пирнахос” маҳалласи.
 

ТАДБИРКОР БОҒЧА ҚУРДИ

DSC_0126

Мактабгача таълимга эътибор кучайганлиги, таълим олишга бўлган талаб юқорилиги боис, соҳада хусусий секторлар ривожланиб, таълимнинг ДХШ, оилавий, нодавлат каби турли шакллари жорий этилмоқда. Бу албатта, фарзандининг келажагига бефарқ бўлмаган, унинг таълим-тарбияси учун астойдил қайғурадиган ота-оналар учун айни муддао бўлди.
Боланинг илк дунёқа-раши, эстетик диди шаклланадиган жой албатта, бу мактабгача таълим даргоҳидир. Шу боис ота-оналар ўз фарзандини барча қулайликларга ва замонавий қиёфага эга, юқори малакали кадрлар билан таъминланган, яқин масофадаги МТТларига олиб боришни афзал кўради.

DSC_0134
Мустақиллик арафасида шаҳримиздаги “Сангар” маҳалласида тадбиркор Сухроб Умидов бошчилигида қурилиш корхонаси томони-дан қуриб фойдаланишга топширилган, инглиз тилига ихтисослашган янги “Smart Kids” ДХШ асосидаги  150 ўринли МТТ ўз иш фаолиятини бошлади. Мазкур ташкилот очилиши билан 20 нафар хотин-қиз иш ўрни билан таъминланди.

DSC_0034  
“Smart Kids”да тарбияланувчилар учун барча шарт-шароитлар муҳайё қилинган бўлиб, ошхона, дам олиш ва ювиниш хоналари, болалар ўйингоҳи ва тадбирлар ўтказишга мўлжалланган катта зал ҳамда спорт майдончаси болалар ихтиёрида. Ўз касбининг фидоийлари, болаларга меҳри чексиз тарбиячилар томонидан машғулотлар инглиз тилида олиб борилмоқда.
- “Smart Kids”нинг қурилиш ва жиҳозлаш ишларига жами 3,5 млрд. сўм маблағ сарфланган бўлиб, шундан 2 млрд 200 миллион сўми тижорат банк-ларининг имтиёзли кредит маблағлари ҳисобига амалга оширилди, - дейди тадбиркор Сухроб Умидов, - буларнинг барчаси албатта, халқимиз ва болажонларимиз учундир. 

Д.МАШАРИПОВ,
“Хива тонги” махсус мухбири.

 

ОИЛА ДАВРАСИДА

оила Яқинда Президент Шавкат Мирзиёев раислигида ўтказилган видеоселекторда айнан шу масалага эътибор қаратган эди.
Ушбу масалада шифокорлар билан маслаҳат қилган ҳолда шундай хулосага келиндики, пандемия билан боғлиқ вазият бу йил жойларда катта йиғин ва сайиллар ўтказишни чеклаш талабини қўймоқда. Шунинг учун ушбу улуғ санани кўпроқ оила даврасида нишонлашни ташкил этиш масалалари муҳокама қилинди, корхона ва ташкилотларда ҳам байрам тадбирлари режалаштирилган тақдирда уларни санитария нормаларига қатъий риоя этган ҳолда ўтказиш мақсадга мувофиқлиги кўрсатиб ўтилди. Оммавий ахборот воситалари ва интернет тармоғида байрам кунлари қизиқарли, янги форматдаги кўрсатувлар, эшиттириш ва чиқишлар намойиш этиш борасида тавсиялар берилди”, - дейилади Президент Матбуот хизмати расмий саҳифасида.

АҲОЛИ ЭҲТИЁЖМАНД ҚАТЛАМИГА ЭЪТИБОР Сессиялар кун тартибининг асосий мазмунини ташкил этди

photo_2020-08-28_22-22-36

Жорий йилнинг 28 август куни халқ депутатлари Хива туман Кенгашининг навбатдаги XII сессиясида аҳолининг эҳтиёжманд қатламини қўллаб-қувватлаш ("Темир дафтар"), тадбиркорликни ривожлантириш, бюджет даромадларини ошириш ва хорижда меҳнат қилган ишсиз фуқароларни ишга жойлаштириш борасида амалга оширилаётган ишлар ҳақида туман ҳокими О.А.Матякубовнинг ҳисоботи тингланди.
Ушбу масала юзасидан депутатлар сўзга чиқиб, ўзларининг фикр-мулоҳазаларини билдирдилар. 
Муҳокама қилинган масала юзасидан халқ депутатлари туман Кенгашининг қарори қабул қилинди.

* * *

photo_2020-08-28_19-22-32

Шунингдек шу куни халқ депутатлари Хива шаҳар Кенгашининг XV сессиясида ҳам Президент Шавкат Мирзиёев раҳбарлигида жорий йилнинг 20 август куни ўтказилган видеоселектор йиғилишида белгилаб берилган вазифалар ижроси бўйича шаҳардаги аҳолининг эҳтиёжманд қатламини қўллаб-қувватлаш ("Темир дафтар"), тадбиркорликни ривожлантириш, бюджет даромадларини ошириш ва хорижда меҳнат қилган ишсиз фуқароларни ишга жойлаштириш борасида амалга оширилаётган ишлар натижадорлиги тўғрисида Хива шаҳар ҳокими С.М.Жума-ниязов маъруза қилди.
Сессияда депутатлар яна иккита масала – шаҳардаги умумтаълим мактабларида пандемия шароитида ўқув жараёнларини бошлаш юзасидан 25-26 август кунлари ота-оналар билан ўтказган йиғилишлар ҳамда улардан олинган сўровнома натижалари ҳақида ва “Бинокор” маҳалласи номини “Янги бинокор” номига ўзгартириш тўғрисидаги масалаларни ҳам муҳокама этиб, тегишли қарорлар қабул қилдилар.
Сессиялар ишида Олий Мажлис Сенати аъзоси, Хоразм Маъмун академияси лабораторияси мудири, архитектура фанлари доктори Г.Дурдиева иштирок этди ва сўзга чиқди.

ХИВА ТУМАН ВА ХИВА ШАҲАР ҲОКИМЛИКЛАРИ

АХБОРОТ ХИЗМАТЛАРИ.
 

"ТЕМИР ДАФТАР" ГА КАМ ТАЪМИНЛАНГАНЛАР КИРИТИЛДИ

Энг улуғ, энг азиз байрам арафасида тумандаги “Темир дафтар”га киритилган 410 та хонадон бошлиқлари билан туман сектор раҳбарлари учрашдилар.
Учрашувда туман ҳокими секторига кирувчи  “Дашёқ”, “Бўстон”, “Гулшан”, “Оқёп”, “Серчали” ҳамда “Қорақум” маҳаллаларида кам таъминланган, эҳти-ёжманд хонадонлар аъзоларининг муаммоларини ўрганиш ва жойида ҳал қилиш бўйича тегишли ташкилот раҳбарлари ва мутахассислар  жалб қилиниб, зарур чора-тадбирлар белгиланди.
Учрашувда фуқаролар томонидан билдирилган ҳар бир муаммо эътиборга олинди. 1-сектор раҳбари О.А.Матякубов ҳар бир оила аъзосига бефарқ бўлмасдан уларни келгусида иш билан таъминлаш, ётувли бемор фуқароларни даволатиш, чорвачилик учун имтиёзли кредитлар ажратиш масалаларида амалий ёрдам кўрсатишни билдирди.

Хива туман ҳокимлиги Ахборот хизмати.

КУТИЛАЁТГАН ВОҚЕАЛАР

. Мактабларда 2020-2021 ўқув йили 14 сентябрдан бошланади.

Шаҳар ва туманимизда оилавий ва давлат хусусий шерикчилик асосида янгидан қуриб битказилган мактабгача таълим ташкилотлари илк фаолиятини бошлайди.

. Янги технологиялар билан қайта жиҳозланган  Хива гилам дастгоҳ-ларидан туркум маҳсулотлар чиқарилади.
 

ТЕРИМГА ТАЙЁРГАРЛИК ҚАНДАЙ?

пахта 1

Туманимизда пахта ҳосилини йиғиб-теришга тайёргарлик кўриш масалалари кун тартибида турибди.
Қишлоқ хўжалиги бош-қармаси бошлиғи О.Қутлиев билан суҳбатимиз шу мавзуда бўлди.
-Туманимизда 5688 гектар майдонда ғўза парвариш қилинмоқда. 106 та  фермер хўжаликлари томонидан давлатга 32 центнердан 18740 тонна пахта топшириш шартномавий режаси қабул қилинган.
Пахта ҳосилини ўз вақти-да ва сифатли йиғиб териб олиш учун 111 та терим отрядлари ташкил этилди. Мавсумда 9136 нафар уй бекалари ва уюшмаган ёшлар вакиллари қатнашади. Уларга 20000 дона фартук тайёрлаб қўйилди.
Терилган пахта хом ашёсини "Xiva Cluster"га узлуксиз етказиб бериш учун 106 та транспорт воситаси ҳамда 185 та трактор тиркамаси мукаммал таъмирдан чиқарилди.
Жорий йил фермер хўжа-ликлари асосий хом ашё етказиш билан бирга, одатдагидек, уруғлик тайёрлашга ҳам алоҳида аҳамият беришган.
715,6 гектар майдонда келгуси йил ҳосили учун сифатли уруғлик ҳосили етиштирилмоқда.
“Раҳимберган хожи Анбар”, “Карим Ёвбосар” (Ирдимзон) 50 центнердан, “Машарип ўғли Собир” (Журён), “Қадам жийилдак” (Соёт), “Даврон” (Гандимён) фермер хўжаликлари мавсумда 40-45 центнердан пахта териб топширишни мўлжаллашган.


(Ўз мухбиримиз).

"САНЪАТДАГИ САНЪАТ"

zbekiston_khal_artisti_sanat_devonov_a_ida_film_suratga_olin  

“Ўзбеккино” Миллий агентлиги буюртмасига биноан “Ҳужжатли ва хроникал фильмлар киностудияси” ДУК томонидан кино ва театр актёри, Ўзбекистон халқ артисти Санъат Девонов ҳақида "Санъатдаги Санъат" номли ҳужжатли фильми телеэкранларда намойиш қилинмоқда.
Санъат Девонов 1932 йил 9 май куни Хоразм вилоятининг Хонқа туманида таваллуд топган. У ижодий фаолиятини Огаҳий номидаги Хоразм вилоят мусиқали драма театридан бошлайди. 1973 йил ҳозирги Ўзбе-кистон давлат санъат ва маданият институтини тамомлаган. Актёр саҳнада Гамлет, Алишер Навоий ва Тоҳир ролларини ижро этган. Санъат Девоновни томошабинлар миллий кинематографиянинг дурдона асарларидан бири – “Мафтунингман” фильми орқали эслашади. Бундан ташқари, «Улуғбек юлдузи», «Оловли йўллар», «Алпомиш» каби фильм-ларда ҳам роллар ижро этган.
Ижодий гуруҳ - режиссёр Муроджон Одилов, тасвирчи Анвархон Қосимов, картина директори Ойбек Содиқовлар Хива шаҳрида фильмни суратга олишди.
Таниқли санъаткорлар шахсига “У санъат билан бир ходиса бўлиб кетган, яьни санъатдаги Санъат”, деб таъриф берилади фильмда.

ПЕНСИЯЛАР МИҚДОРИ ОШИРИЛДИ

Президентимизнинг 2020 йил 30 июлдаги “Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида”ги Фармони қабул қилинди.
Ушбу Фармонга мувофиқ, жорий йил 1 сентябрдан бошлаб пенсиялар, болаликдан ногиронлиги бўлган шахсларга, зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақалар миқдори 1,1 баробарга оширилди.
1 сентябрдан бошлаб Ўзбекистон Республикаси ҳудудида:

пенсияни ҳисоблашнинг базавий миқдори — ойига 262 470 сўм;

ёшга доир энг кам пенсиялар — ойига 513 350 сўм;

болаликдан ногиронлиги бўлган шахсларга бериладиган нафақа — ойига 513 350 сўм;

зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақа — ойига 315 030 сўм этиб белгиланди.
 

Қ.САЛАЕВ,
Бюджетдан ташқари пенсия жамғармаси Хива шаҳар бўлими бошлиғи.
Д.САЪДУЛЛАЕВ,
Бюджетдан ташқари пенсия жамғармаси Хива туман бўлими бошлиғи.

“САНГАР”ДАН БОШЛАНГАН ТАШАББУС БАРЧА МАҲАЛЛАЛАРГА КЕНГ ЁЙИЛМОҚДА

Тоиржон Жабборов мана бир неча йиллардан бери “Сангар” МФЙ раиси бўлиб ишлаб келмоқда. Бунгача Ички ишлар органлари тизимида фаолият кўрсатган. Истеъфодаги полковник, “Шуҳрат” медали соҳиби.
Маҳалла сардори жуда кўп хайрли ва эзгу ишларга бош-қош. Ҳудуддаги ҳар бир янги ўзгариш ҳамда ташаббусларда унинг ҳиссаси бор. Баҳорнинг илк кунларида у яна бир хайрли бошламани бошлаб берди. Кам таъминланган, кам даромадли хонадонлардан 15 нафар оила бошлиқларини илгари “Қаландар бобо” деб аталиб келинган, бир пайтлар ҳосилдор, хосиятли ерда ҳосил ундирилган, афсуски кейинчалик ўз ҳолига ташлаб қўйилган 5 гектарлик майдонга бошлаб келди.
- Мана Сизга қўшимча даромад манбаи,- деди Тоиржон маҳалладошларига. - Фақат озгина тер тўкишга тўғри келади. 
Оила бошлиқлари аввал бошдан бўш ётган далани ажриқлардан тозалашга тушишди. Сўнгра шаҳар ҳоким-лиги техникадан ёрдам берди. Озиқ-овқат маҳсулотлари экиш майдонларига уруғлик ҳамда сув йўлларини очиш масаласи ҳам хал этилди.
Бу хайрли ишлардан биринчидан, аҳоли ишсиз қатламининг бандлиги таъминланса, иккинчидан, ўзлари учун озиқ-овқат маҳсулотлари етиштирилади.
Дарвоқе, бу файзли мас-канда тез кунларда фойдаланишга топшириладиган икки қаватли мактабгача таълим ташкилоти қад ростлади. Яна бир ажойиб янгилик: боғчага туташ майдонда маҳалла фуқа-ролар йиғинининг янги биноси қурилиши ҳам бошланган. Хуллас, “Сангар”ликлар бугун улкан қурилиш, бунёдкорлик ишлари билан янги маҳалла қиёфасини яратиш учун ас-тойдил меҳнат қилмоқдалар.
Агар яратиш, яшнатишнинг айни марказига айланаётган меҳнат жабҳаси билан танишиш истагида бўлсангиз, “Қаландар бобо” боғу бўстонига бир келинг!                                                                                                                 

Ш.МАШАРИПОВ,
Д.МАШАРИПОВ, 
(суратлар), 
“Хива тонги” мухбирлари.

ИШЛАБ ЧИҚАРИШНИНГ ЯНГИ ШАКЛИ “Хiva Cluster”да қандай намоён бўлмоқда?
Илгари туманимиздаги “пахта тайёрлаш заводи” ёки “пункти” деб ўрганиб қолган “ном”лар эндиликда ўтмишга айлангани рост. Мана иккинчи мавсумдирки, Шомохулумдаги ҳамма ҳудуд фермерларига яқин ва қулай янги “Хiva Cluster” МЧЖ самарали фаолият кўрсатмоқда.
Ушбу йирик кластернинг иш жараёнлари ҳамда тажрибалари билан танишар эканмиз, янги замон технологиялари, хусусан, кластернинг афзалликлари, истиқболдаги режалари нималардан иборат эканлиги ҳақида “Хiva Cluster” МЧЖ бош ҳисобчиси Отабек Сапаевга мурожаат қилдик:
- Жамиятимиз 2018 йилнинг декабрь ойида ташкил этилди. Албатта, янги технологиялар асосида иш юритишнинг ўзи бўлмайди. Бошда бироз қийинчиликларга, тўсиқларга дуч келдик. Шукурки, эндиликда ҳаммаси ортда қолди. Қолаверса, пахтачиликка ихтисослашган фермер хўжаликлари ҳам кластернинг имкониятлари ва афзалликларини тушуниб етишди.
Фермерларга уруғлик, минерал ўғит, биомаҳсулотлар ўз вақтида етказиб берилгани учун таъминотда деярли узилишларга йўл қўйилмади. Бу энг асосий натижа. Улардан шартномадаги 18509 тонна юқори сифатли саноат хом ашёсини қабул қилиб олганимиздан сўнг уни ўзимизда тола ажратиш - яьни тайёр маҳсулотга айлантирдик.

- Қанча иш ўринлари яратилди? Уларга яратилган шарт-шароитлар, ойлик маошлари ҳақида ҳам тўхталсангиз?
- Албатта, шароит бор жойда барака, унум бўлади. Жамоамизда етарли меҳнат ва дам олиш имкониятлари яратилган. Хусусан, узоқдан қатнаб ишлайдиганлар учун ётоқ, иссиқ овқат ташкил этилган. Доимий ва мавсумий ишлайдиган 250 нафар ишчиларимизни ўртача ойлик маоши 1 млн. 250 минг сўмдан кам эмас. Пахта йиғим-терими даврида бу миқдор янада оширилиши ҳам ҳисобга олинган.
- Жамиятнинг келгуси истиқболдаги режалари ва ишлаб чиқаришга яна қандай ўзгаришлар жорий қилинади?
- Ҳаёт бир жойда тўхтаб қолмайди. Шу маънода корхонамизда келгусида ип-калава, сочиқ, ўсимлик мойи ишлаб чиқаришни йўлга қўйиш, шунингдек, чорвачилик комплекси бунёд этишни ҳам режалаштириб қўйганмиз.
- Бунинг учун янги асбоб-ускуналар сотиб олиш, энг муҳими илғор илм-фан технологиялари ва ўзаро тажриба алмашишлар қўл келади, деб ҳисоблайсизми?
- Албатта! Буларсиз бир қадам ҳам олдинга силжиб бўлмайди. Айниқса турдош корхоналар фаолияти билан яқиндан танишиб туриш керак. Қолаверса, янги пахта йиғим-терими мавсуми яқин. Демак, тайёргарлигимизни бекаму кўст қилишимиз керак. Ўйлаймизки, шартномавий мажбурият ва унга мос равишда ҳақ тўлаш ҳар икки томоннинг манфаатдорлигини оширади.

Суҳбатдош Ш.МАШАРИПОВ.

ТАҲРИРИЯТДАН: янги тизимда фаолият юритиш ўзини оқлаши турган гап. Буни қуйидаги мисолда билса бўлади: ҳозир бир килограмм калава ип дунё бозорида 2-2,3 долларга сотилади. Агар шу ип ўзимизда қайта ишланса, 2 та эркаклар шими тикилади. Унинг бир донаси камида 15 доллардан экспорт қилинса, 30 долларга айланади.
Бу бир сўз билан айтганда Давлатимиз раҳбарининг кластер ғоясидан кутилаётган пировард натижасидир.

 

ЎТТИЗ ЙИЛ ОЛДИНГИ ФАКТЛАР ЯРОҚСИЗ

Дунёдаги ҳар бир мамлакат, ўзининг аҳолиси ва унинг яшаш ҳолати бўйича ишончли маълумотга эга бўлиш мақсадида мунтазам равишда аҳолини рўйхатга олади. 

Ҳозир жаҳоннинг кўплаб ривожланган давлатларида аҳоли ўртача ҳар ўн йилда камида бир марта рўйхатдан ўтказилмоқда. Халқаро амалиёт шундай! Бизда-чи? Ўзбекистон ҳудудида илк бор аҳолини рўйхатга олиш тадбири 1897 йилда амалга оширилган. Шундан сўнг 1926, 1939, 1959, 1970, 1980 йилларда аҳоли рўйхатга олинган. 
Амалдаги жорий ҳисобга кўра, 2020 йилнинг 1 июль ҳолатига кўра Хива шаҳар ва туманининг доимий аҳоли сони мос равишда 92,5 минг киши ва 145,5 минг кишини ташкил этади. Хива шаҳрида жами аҳолининг 49,6 % ни эркаклар (45,9 минг киши), 50,4 % ни аёллар (46,6 минг киши),  Хива туманида жами аҳолининг 49,6 % ни эркаклар (72,2 минг киши), 50,4 % ни аёллар (73,3 минг киши) ташкил этади. 
Аҳолининг жорий ҳисоби бўйича мавжуд маълумотлар аҳоли сони, яшаш шароити, маълумоти, бандлиги, ёш-жинс таркиби, миллат таркиби, Хива шаҳар ва туман ҳудудида аҳолининг жойлашуви ва бошқа ижтимоий-демографик ўзига хосликлар тўғрисида аниқ хулоса ва таҳлиллар қилишга етарлича имконият бермаяпти.
Мамлакатимизда 1989 йилдан кейин ҳали бирор марта ҳам аҳолини рўйхатга олиш ишлари бажарилмади. Бу масала роппа-роса 30 йил ортга суриб келинди. Шу туфайли демографик муаммоларимиз қалашиб кетди. Одамларнинг ҳақиқий ҳаёт тарзини ўрганиш ва уларга амалий ёрдам кўрсатишда қатор қийинчиликлар вужудга келди.
Ниҳоят  БМТ 2015 йилнинг 10 июнида “2020 йилда аҳоли ва уй-жой фондини рўйхатга олиш борасидаги принциплар ва тавсиялар” резолюциясини қабул қилди. Унга кўра, БМТга аъзо давлатлар камида бир марта аҳоли ва уй-жой фондини рўйхатга олишни ўтказиши белгилаб қўйилди. Ҳозир Ҳамдўстлик давлатларида бу жараёнга тайёргарлик бошланиб кетган. Хусусан, Ўзбекистонда ҳам! Президентимизнинг 2019 йил 5 февралдаги “Ўзбекистон Республикасида 2022 йилда аҳолини рўйхатга олишни ўтказиш консепциясини тасдиқлаш тўғрисида”ги Фармони бу борада ҳуқуқий асос бўлиб хизмат қилмоқда.

Ҳ.ЭГАМОВ,
Хива шаҳар статистика бўлими бошлиғи.

Ш.БОБОЖОНОВ,
 Хива туман статистика бўлими бошлиғи. 

 

ДЕПУТАТ ТЎЙГА БОШ-ҚОШ БЎЛАДИ

Меҳр-оқибат, хайр-саховат, кўмак, ҳашар каби бизнинг азалий удумларимиз, ўзига хос қадриятларимиз борки, булар авлоддан-авлодга ўтиб келмоқда.

Айниқса, ҳозирги пандемия шароитида ижтимоий муҳофазага муҳтож, тўю томошаларни кам чиқимли тарзда ўтказиб, ортиб қолган маблағга ёшларни келажаги учун, уларнинг мод-дий турмуш шароитини яхшилаш учун сарфлаш энг мақбул ва оқилона йўл эканлигини таъкидлаш ўринлидир.
Қашқадарё вилояти Китоб туманидан Халқ депутатлари вилоят кенгашига Ўзбекистон Миллий тикланиш демократик партиясидан сайланган депутат Муаббара Ҳакимова ўзи сайланган ҳудудлар – “Боғбон”, “Бектемир”, “Соҳибкор” маҳалла фуқаролар йиғинларида бўлиб, кам таъминланган, эҳтиёжманд, боқувчисини йўқотган ва ногиронлиги бор оилалар ҳолидан хабар олди.
Депутат “Очамайли” қишлоғида истиқомат қилувчи ногирон онахон Назокат Султонова хонадонида бўлиб, у кишининг яшаш шароити билан танишди. Қизи ҳам ногирон, аммо ўғли Асқарбек бақувват, соғлом эканлиги, у оилани иқтисодий таъминлаш учун ёлланма ишларга чиқиши, ишда бўлган вақтида эса эс-ҳуши онаси ва опасида бўлишидан хабардор бўлди. Шунда депутат, Асқарбек бир инсофли, диёнатли, ҳунарманд қизни топиб уйлантириб қўйилсагина хотиржам ишлаши ва иш унуми юқори бўлиши, бир оила камбағалликдан чиқиб кетиши мумкинлигини айтиб таклиф берди. 
Яъни қўни-қўшни ва маҳалла маслаҳат-чисига Асқарбекни кўнглига ёқадиган қиз топиб, менга билдирсангиз тўйга ўзим бош бўламан, деб илтимос қилди. Орадан икки ҳафта ўтгач, маслаҳатчи Зарифа опа қўнғироқ қилиб, тикувчи қиз топилганини ва у Асқарбекка ёққанини, ёшлар турмуш қуришга аҳд қилганлигини билдирди.
М.Ҳакимова фарзандининг тўйи тараддудида юрган онахонга кўмак бериб, унинг ёнида турмоқда. Асқаржонни тўйига тайёргарлик ишлари бошлаб юборилди. Улар томонидан келин учун бетакрор, чиройли либослар, қимматбаҳо газламалардан иборат сеп, кўрпа-тўшаклар тайёрланди.
Ташаббус сабаб Асқарбекни тўйини карантин талабларига мос кам чиқим қилиб ўтказиб берувчи саховатли ҳомий ҳам топилди. Карантиндан сўнг тўй депутат бошчилигида ўтказиладиган бўлди.
Доно халқимизда “Савоб ишни ҳар ким, ҳар кун қилиши даркор” деган пурҳикмат ибора бор. Юртимиз бағрикенг, саҳоватпеша, савоб талаб инсонларга бой. Ана шундай савобли, хайрли ишларимиз кўпаяверсин. Ёшларни қўллаб-қувватлаб, уларга бахт тилаб, кўмак бериб, хайриҳоҳ бўладиган ишларимиз бардавом бўлсин.

 

Шаҳноза ҚАҲҲОРЗОДА,
Ўзбекистон Миллий тикланиш демократик партияси вилоят кенгаши матбуот котиби.

 

“БИНОКОР”ДА ЯНА КЎП ҚАВАТЛИ УЙЛАР ҚУРИЛАДИ

Еттита ана шундай уйлар маҳалла ҳудудида барпо этиш режалаштирилган. Қувончлиси, янги турар-жойларнинг 1-қаватида озиқ-овқатлар дўкони, дорихона, сартарошхона каби маиший хизмат кўрсатиш шахобчалари жойлашади.
Бу ҳақда Хива шаҳар ҳокими С.М.Жуманиязов яқинда уйма-уй юриб, аҳоли муаммоларини ўрганишга бағишланган йиғилишда айтиб ўтди.
- Бундан ташқари анчадан буён бўш, фойдаланилмаётган биноларни тадбиркорларга ижарага бериш орқали ишсизлар, камбағаллик даражасини қисқартириш мумкин.
Йиғилишда Бандлик маркази, коммунал хизмати, электр энергияси, газ таъминоти, истеъмол суви ташкилотлари раҳбарларига жид-дий эътирозлар билдирилди.
- 2-қаватда яшайдиган ногирон эр-хотин икки километр масофадан хонадонига сув ташишмоқда. Бу қанақаси? “Водопровод” таш-килоти қаерга қараяпти? Шу ташкилотнинг раҳбари Баҳром Яқубов тезда вазиятни ўрганиб, истеъмолчиларга амалий ёрдам кўрсатинг, деб топшириқ берди ҳоким.
Мутасаддилар маҳаллани йиллар давомида келиб, ўр-ганмагани кўриниб турибди. Бу ерда жуда кўп эътиборталаб ҳаётий муаммолар тўпланиб қолган. Вазифа эса қисқа фурсатлар ичида ушбу масалаларга ижобий ечим топиш, чора-тадбирлар белгилашни тақоза этади. Вақт кутиб турмайди.

ДУГОНАЛАР

Насиба зиёли оилада туғилиб вояга етди. Ота-онаси фарзандлари кўп бўлишига қарамай, ҳар бирининг ўқишига алоҳида эътибор қаратишар, уларга мунтазам вақт ажрата олардилар.
Унинг дугонаси Умиданинг ҳеч нарсадан ками йўқ, қўл узатган нарсасига етадиган қиз. Фарзандининг ақлли, тартибли ва ораста бўлиши учун уйдагилар ҳеч нарсани аяшмас, нимани кўнгли тусаса, дарров муҳайё килишарди. Бироқ, у ота-онасининг ишончини оқлаш у ёқда турсин, хатто дугонаси танбех берса ҳам ўз айтганидан қолмайдиган бетга чопар, шаддод қиз бўлиб ўсди.
Насиба одобли, зукко қиз бўлгани боис олий ўқув юрти талабаси бўлди. Олийгоҳ дом-лалари шундай қизни тарбиялаган ота-онасига миннатдорчилик билдириб, келажакда Насибадан ажойиб, ўз ишининг моҳир устаси бўлиб етишиб чиқишига ишонардилар.
Умида эса мактабни аранг тугатиб, ҳеч қаерда ўқишни истамади. Дугонаси Гули билан сартарошга шогирд тушишди. Гули Умиданикига тез-тез келиб турар, орада онасининг тақинчоқларини кўз-кўз қи-ларди. Бу зеби-зийнатлар Гулининг кўзини ўйнатарди.
...Орадан йиллар ўтди. Бир куни Гули билан Умида ўрта-сида гап қочиб, бир-бири билан юз кўрмас бўлиб кетишди. Гап орасида Умиданинг асранди экани, онаси фарзанд кўрмага-ни, етимлиги ҳам айтилди.  
Шу воқеадан кейин ота-онаси ҳар қанча уринмасин, Умидани уйда олиб қолишнинг иложи бўлмади. У уйдан чиқиб кетиб, болаликдаги дугонаси Насибани қидириб топди. Бўлган воқеаларни йиғлаб-йиғлаб гапириб берди. Насиба дугонасининг тўғри иш қилмагани, ота-она қандай бўлмасин уни вояга етказгунга қадар озмунча машаққат чекмагани, уйга қайтиши хақида қанча айтмасин, барибир унамади. 
Умида Насибанинг уйида яшай бошлади. Бу хақда Насиба унинг ота-онасига хабар қилди. Бироз вақтдан кейин дугонаси қилган хатосини тушуниб етиши хақида гапирди. Умида бўш пайтларда Насибанинг китобларини ўқирди. Абдулла Қодирийнинг “Ўткан кунлар”, Ўткир Хошимовнинг “Дунёнинг ишлари” китобларини мутолаа, қилар, улардан олам-олам маъно оларди. Фикри тиниқлашди. Ота-онасини қўмсай бошлади ва бир куни Насибага уйга қайтишга уялаётгани хақида гапириб қолди. Насиба дугонасининг қароридан севинди, унга ўзи бошлаб боришини айтди. 
- Ўтган зое кетган давримни сарҳисоб қилсам, биринчидан, сендек дугонам борлиги мен учун – бахт экан! Иккинчидан, сен тавсия қилган китоблар менинг тафаккуримни бутунлай ўзгартириб юборди. Уларни ўқиб, ўзбек аёлидаги шарм-ҳаё, иффат, Отабекдаги жасорат эгаси бўлишга ҳава-сим ортди. Шундай ота-онам борлигидан ўзимни бахтли хис қилдим, орзуларимга эришиш иштиёқи янада ошди. Яшашдан мақсад нима экани, онани қандай эъзозлаш кераклигини англадим. Бунинг учун сенга рахмат! - дея йиғлаб юборди.
Умиданинг ота-онаси ажралмас дугоналарни қучоқ очиб кутиб олишди.
...Насиба уйига қайтар экан, китобхонлар сафи яна биттага кўпайганидан хурсанд бўлди.

Мақсуда ЮСУПОВА,
Хива шаҳридаги 1-сон мактаб она тили ва адабиёти фани ўқитувчиси.

ХАТ ҲАЁТ НАФАСИ

Мактублар, мактублар, сон-саноқсиз мактублар... Таҳририятимизга келаётган ана шундай қалб сатрларида қайноқ ҳаёт нафаси акс этади.  Зеро аллома шоиримиз Матназар Абдулҳаким айтганидек: “хат-ҳаётнинг юлиб олинган парчасидир”.
Хабарларнинг бирида буюк ўзгаришлар, хусусан, “Обод қишлоқ” ва “Обод маҳалла” дастури бўйича амалга оширилаётган кенг кўламли ишлар васф этилса, иккинчисида таъминотдаги узилишлар, йўлларнинг носозлиги, бозорлардаги ноқулайликлар каби холатлар куюнчаклик билан қайд қилинади.
Ўтган йил тарихга олтин ҳарфлар билан ёзиладиган йил бўлди. Қисқа фурсатларда Президент мактаби, Огаҳий ижод мактаби, маданият ва истирохат боғи, меҳмонхоналар қурилди, йўлларга асфальт ётқизилди. Би сўз билан айтганда Кўҳна қаъламиз ўтмиш билан бугунни уйғунлаштириб, ёрқин келажак сари одимламоқда.
Бундай ўзгаришлар барчамизни тўлқинлантиради, янада янги марраларни забт этишга чорлайди.
Ҳар бир соҳанинг йил якунида сарҳисоби бўлганидек, биз таҳририят ходимларининг ҳам кўпсонли муштарийларимизга айтадиган сўзимиз, илинжимиз бор. Чунки, матбуот ҳаёт ойнаси. Жамиятда учрайдиган хусну малоҳатни ҳам, қабоҳатни ҳам бирдек ёритади.
Ҳар бир таҳририят шубҳасиз хат билан фаол. Ранг баранг мавзулар хат орқалигина газетада содда, равон тил билан ифодаланади. 2019 йилда бизга 1500дан зиёд хат, ариза шикоят келди. Уларда турли муаммолар, камчиликлар,  таклифлар, фикрлар ўртага ташланган.
- Ҳаётимнинг бирор кунини даврий нашрларсиз тасаввур қилолмайман,-деб  ёзади муаллима Умида Абдураҳмонова, - чунки дарс жараёнида воқеа, янгилик ва хабарларни ўқувчиларимга ҳам ўқиб бераман. Ўзим ҳам тажрибаларимни “Хива тонги” газетаси орқали ҳамкасбларим билан ўртоқлашаман.
Дарвоқеа, таҳририятимиз билан мустаҳкам алоқа ўрнатган Умидадек муштарийлар ва жамоатчи мухбирларимизнинг сафи йилдан-йилга кенгайиб бормоқда. Улардан, “Саломатлик” маркази валеолог шифокори Аминбой Болтаев, маънавият ва маърифат тарғибот маркази шаҳар бўлинмаси раҳбари Шоҳиста Абдуллаева, мусиқашунос Давлатназар Юсупов, спорт шарҳловчиси Рустам Хўжаев, хуқуқшунос Гавҳаржон Саъдуллаева каби ўз соҳалари бўйича таҳририятимизга мақолаларини жўнатаётган кўмакдошларимиз борки, биз улар билан хақли равишда фахрланамиз. Янги йилда ҳам улардан янги мазмундаги хат-хабарлар кутамиз.
Муштарийларимизнинг байрам билан самимий муборакбод этиб, газетамиз орқали доимий ҳамроҳ бўлишга, мактублар йўллашга даъват этамиз. 2020 йил ҳаётингизнинг асл маъно-мазмунига айлансин. Сизларни Ишонч, Умид ва Муҳаббат асло тарк этмасин, азизлар!

“Хива тонги” 
газетаси таҳририяти. 

ҲАРОМ ПУЛ – ДЎЗАХГА ЎТИН

Оллоҳ  таоло инсонга беҳисоб неъматлар ато қилган. Фарзанд неъмати бўлсин, мол-дунё неъмати бўлсин – буларнинг барчаси дунё ҳаётининг зийнатидир.
Ҳаворийлар Ҳазрат Исодан сўрадилар: “Сенинг ниманг борки, сув узра юра оласан, биз эса юролмаймиз?” Ҳазрати Исо: “Сиз ўз наздингизда пулни қандай баҳолайсиз?” Ҳаворийлар: “Яхши баҳолаймиз.” Ҳазрати Исо: “Менинг наздимда пул билан лой бир қийматдадир.” дедилар.
Ҳасан Басрий айтдлар: “Пул азиз қилган ҳар инсонни Оллоҳ хор айлагай, шунинг учун ҳам Оллоҳ ҳалол қилиб мол-дунёни, маблағларимизни ҳаром йўлларга ишлатиб дўзахга ўтин қилмайлик.”
Оллоҳ берган неъматларнинг қадрига етиб, умргузаронлик қилиб яшасак, Оллоҳ таоло умримизни, ризқимизни, давлатимизни янада зиёда айлагай!

Ш.БОЙНАЗАРОВ,
тумандаги Хон Исмоил Журжоний масжиди имоми.

 

СЕВИМЛИ ГАЗЕТАНГИЗГА ЁЗИЛИШНИ УНУТМАНГ!

2020  йил  учун "Хива тонги"  газетасининг  обуна  баҳоси 135 000 сўм қилиб белгиланди. Нашр кўрсаткичи-8008.
Обуна "Ўзбекистон поч-таси" Хива филиалида ва "Матбуот тарқатувчи" шўъба корхонаси филиалида ҳамда бевосита таҳририятимизда қабул қилинмоқда.